Unsay buhaton aron mapanag- iya ang luna nga gipuy-an?

Dear Atty. Divine,

Good day attorney ug sa tanang readers ani nga mantalaan. Im Hazel, 25, married. Ang ako pangayuan ug tambag nimo Atty. bahin sa yuta nga nahimutangan sa balay sa akong mga ginikanan. Sa ako jud ni nga apohan nga yuta, amahan sa ako papa. Bisan buhi pa ang akong apohan attorney iya na gitagaan ug bahin ang tagsa tagsa niya ka mga anak, apil na ang akong amahan. Ang bahin sa akong papa Atty. perteng layua sa karsada toa na dapit sa sapa unya bakilid pa jud kaayo ang agianan mao nga nitukod ug balay ako Papa didto sa bahin sa akong uyoan nga duol sa karsada nga ulitawo pa hangtod karon og nisugot ra sab ang akong uyoan. Ang akong pangutana nimo attorney , mahimo bang maangkon sa akong Papa kining dapit nga gitukuran sa balay sa akong ginikanan? In case papahawaon ang akong mga ginikanan sa akong uyoan, unsa angayan nga buhaton sa akong mga ginikanan? Naa bay katungod ang akong Papa nga magpili kung asa siya gusto magpabahin?

Thank you and more power sa imo nga column. — Hazel

Dear Hazel,

Ubos sa atong balaud, kun ang mga ginikanan adunay kabtangan nga gibilin, ang mga anak kinahanglan nga magpatas sa pagbahin niini. Apan kun gibahin na kini daan sa imong Lolo samtang buhi pa sila unya gidawat sab sa imong amahan ang iyang bahin then hayan mao gyud to ang masunod. Kun ang imong uyuan misugot nga motukod og balay ang imong papa sa iyang bahin wa sab kana magpasabot nga aduna nay katungod ang imong papa nga moangkon niini ilabi na kun nabalhin na sa pangan sa tagsa-tagsa kanila ang ilang mga bahin. Buot ipasabot nga kun gamiton na sa imong uyuan ang maong yuta unya iya mong papahawon hayan mapugos gyud mo sa pagpahawa. Kun gusto mo nga mamahimo nang legal ang inyong pagpuyo sa maong yuta mas maayo nga inyong tanyagan ang inyong uyuan nga inyo siyang bayloan part sa share sa imong papa nga katumbas sab sa gidak-on sa inyong gipuy-an sa bahin sa inyong uyuan kon landswapping ba apan dili ang kinatibuk-an kondili part lang. Lain sab nga paagi mao ang pagpalit gikan sa imong uyuan sa luna nga gitukuran og balay sa imong papa aron hingpit na gyud kini ninyong maangkon ug wa nay makapapahawa kaninyo. Hinaut nga akong natubag ang imong mga pangutana. Daghang Salamat and God Bless. — Atty. Divine

* * *

Alang sa inyong mga pangutana may kalabutan sa problemang legal, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong pangutana matag adlaw’ng Miyerkules ug Domingo dinhi ning atong column.