Lalaki patay human hapaka og tipak nga semento sa ulo

CEBU, Philippines — Patay ang usa ka 42-anyos nga resort caretaker human kini hapaka og tipak nga semento sa ulo sa usa ka 52-anyos nga lalaki nga nipasangil sa biktima nga nangawat sa mga manok, insidente nahitabo diha sa Barangay Poblacion Occidental, Lungsod sa Consolacion niadtong Domingo sa gabii.

Ang biktima giila nga si Damiano Bug-ot, Jr., residente sa Barangay Pulpogan, Lungsod sa Consolacion. Ang suspetsado giila nga si Moises Cambis,Jr., 52, taga Barangay Poblacion Occidental sa maong lungsod ang nisurender sa kapolisan niadtong Lunes sa kadlawon.

Ang Consolacion Municipal Police Station nakadawat og taho kanbahin sa usa ka tawo nga nakit-an nga wala na maglihok ug nabulit sa dugo ang nawong niini diha sa Villa Roca.

Daling niresponde ang kapolisan sa maong alarma diin ilang nakita si Bug-ot nga adunay grabeng samad sa nawong ug ulo.

Si Cambis nangangkon nga natulog siya diha sa usa ka payag ug nakamata siya tungod sa kasaba sa iyang mga manok nga giandam alang sa ihawan.

Ug sa iyang pagsusi giingong nakita niya si Bug-ot nga nisulod sa iyang mga manok sa sako.

Matud ni Cambis nga iyang gigukod si Bug-ot apan giingong nisukol kini hinungdan nga iyang gihapak ang ulo niini sa tipak nga semento nga iyang gihimo hinungdan nga natumba ang biktima ug wala na kini makalihok.

Gidala si Bug-ot sa Eversley Childs Sanitarium and General Hospital sa Dakbayan sa Mandaue apan gideklara kini sa doktor nga patay na dihang naabot sa ospital.

Si Cambis posibleng mag-atubang kini og kasong homicide. (BANAT NEWS)