Mayon nag-alburoto ulit

MANILA, Philippines — Muling nag-alburoto ang bulkang Mayon sa Albay makaraang makapagtala ito ng anim na volcanic earthquakes at dalawang rockfall events sa loob ng 24 oras.

Sa record ng Phivolcs, dalawa sa naturang pagyanig ay phreatic eruption na nagdulot ng may 300-500 metrong taas na kulay abo na usok na nagmula sa bunganga ng bulkan. Nakapagluwa rin dito ng 988 tonelada ng asupre kada araw.

Patuloy na nasa Alert Level 2 ang Mayon na na­ngangahulugan na patuloy ang pag-aalburoto nito.

Pinaaalahanan ng Phivolcs ang publiko na huwag papasok sa loob ng 6 km-radius Permanent Danger Zone at sa precautionary 7 km-radius Extended Danger Zone partikular sa may bahagi ng Anoling, Camalig hanggang Sta. Misericordia, Sto. Domingo dahil sa banta ng pagbagsak ng bato mula sa dalisdis ng bulkan at pagluwa ng pyroclastic materials.

Niliwanag ng Phivolcs na wala namang kinalaman sa mainit na panahon ang muling pag-aalboroto ng Mayon.