TRO vs RTPL ibinasura ng Quezon City court
MANILA, Philippines – Ibinasura ng Quezon City Regional Trial Court ang petisyon ng Bukluran ng mga Manggagawang Umaasa sa Industriya ng Seguro o BMIS na humihiling ng temporary restraining order sa programa ng DOTC-LTO ukol sa pagpapatupad ng Reformed Third Party Liability o RTPL.
Sa kautusan na inilabas ni RTC Branch 105 presiding Judge Rosa Samson nitong Nobyembre 9, inatasan nito sina LTO Chief, Assistant Secretary Alfonso Tan, Jr., ang counsel ng BMIS na magsumite ng kani-kanilang posisyon o memoranda para sa aplikasyon ng temporary injunction.
Nauna nang tiniyak ng LTO ang pagpapairal ng RTPL kasunod ng talamak ng katiwalian at reklamong kanilang tinatanggap laban sa CTPL o Complusory Third Party Liability.
Ayon kay LTO spokesman Jayson Salvador, walang dahilan para pigilan ng sinuman ang RTPL dahil lahat ng positibong pakinabang ng publiko at ng gobyerno ay makakamit dito.
Tinukoy ni Salvador ang pagpuksa sa mga bogus insurance company na kumontrol sa CTPL sa mahabang panahon at ang kawalan ng benepisyo ng mga vehicle owners sa tuwing mangyayari ang aksidente.
Binigyan ng 15 araw ng korte ang petitioner at ang LTO-DOTC para makapagsumite ng kanilang mga posisyon bago solusyunan ng hukuman ang isyu ng magkabilang panig.
- Latest
