4-0 tuyo sa Beermen

CEBU, Philippines — Suwayan sa defending champion San Miguel Beermen pagpanalipod sa ilang limpiyong baraha sa ilang sangka batok sa NLEX Road Warriors sa PBA Philippine Cup didto sa Cuneta Astrodome.

Sa dili pa sila mag-abot sa alas 7 sa gabii, magsangka una ang Blackwater Elite ug GlobalPort Batang Pier sa alas 4:30 sa hapon.

Ang Beermen nakabihag na og tulo ka lig-ong koponan nga naglakip sa Phoenix Fuel Masters, Meralco Bolts ug TNT KaTropa ug paningkamutan nila nga modaog karon batok sa NLEX aron moposte og 4-0 nga baraha.

Si coach Leo Austria maglaum gihapon sa gitawag karon nga “Magnificent 5” sa SMB nga naglangkob ni reigning MVP JuneMar Fajardo, Arwind Santos, Marcio Lassiter, Alex Cabagnot ug Chris Ross.

Hinuon, si Austria nagkanayon nga mas alisto sila batok sa NLEX ni coach Yeng Guiao tungod kay gitan-aw ang koponan nga usa na ka playoff team tungod sa paglig-on sa ilang line-up itandi sa miaging season.

Mobida sa NLEX ang mga veterans nga sila si Alex Mallari, Larry Fonacier, JR Quiñahan, Asi Taulava ug super rookie nga si Kiefer Ravena kinsa mirehistro og 31 puntos sa miaging duwa.  (BANAT)