^

Banat Opinyon

Patrolya kanunay

RENBOR PATROL - Rene U. Borromeo - Banat

Makaayo ba ang pag-uswag sa barangay election?

Aw, kon maayo ang inyong mga opisyal sa barangay, way problema kon dili idayon ang eleksyon karong Disyembre 5, apan kon pakloy ug wa ninyo magustohi, gusto gyud mo’g eleksyon.

Ato lang paabuton ang hukom sa mga magbabalaod kon idayon ba, o dili, ang barangay election. Pero nagtuo gyud ko nga dili gyud mahinayon ang eleksyon karong tuiga.

* * *

Pastilan, nagkagot ang akong bag-ang samtang nagtan-aw sa video nga gi-upload diha sa social media nga nagpakita sa usa ka batan-on nga mikuot sa pitaka sa babayeng naglakaw.

Kanus-a pa man mapuo kining matanga sa mga tawo? Unsa may gihimo sa ilang mga ginikanan nga gipasagdan ra man ang ilang mga anak nga nahisalaag sa hiwi nga dalan?

Pasayloa ko ninyo nga dili gyud ko malooy kon kining maong mga batan-on, pangtipion. Nakasuway na man gud ko nga nabiktima sa pagpangawat.

Gani, gisulod gyud og kawatan ang akong balay kaduha na ka higayon. Mao nga giandaman nako ang kawatan og sinaw kaayong bronse kon mobalik man.

Awhagon nako ang mga polis ug mga tanod nga pagpahigayon mo kanunay og preventive patrols aron moislag kining mga badlongon.

* * *

Nakakita ko og video nga nagpakita kon unsa kapait ang kahimtang sa mga lumolupyo sa usa ka gamay’ng isla diha sa Bohol.   

Nakalimot lang ko kon unsa kadto nga isla, gamay ra gyud kaayo nga isla, diin hangtud karon daghang kabalayan ang guba lang gihapon human gilampurnas sa bagyong Odette.

Ang naluoyan nako kay ang tubig sa dagat molamwas tawon sa sulod sa kabalayan, ug ang ilang basketball court, masanapan sa tubig kon magtaob.

Unya, ang gamay nila nga classroom, guba kaayo nga wa nay atop. Sa maong gamay’ng classroom mag-ipon ra kuno ang mga tinun-an sa upat ka grades.

Luoya. Unta, maatiman kini sa kadagkoan sa Department of Education (DepEd) ug matabangan ni Bohol Gov. Aris Aumentado pinaagi sa paggahin og pundo gikan sa Special Education Fund.

* * *     

Hapit na gyud mahuman ang Lusaran-Busay-Lahug Bulk Water project nga kapahislan na unta sa katawhan nga nagpuyo sa upland barangays.

Kon way kakulian, Septiyembre 4 ang petsa sa pag-agas. Maayo unta kon mahinayon aron nga makatubig na ang taga bukid, ug madugangan ang suplay nga tubig sa MCWD.

Usa kini ka nindot kaayong proyekto sa MCWD ubos sa pagdumala ni Chairman Jose Daluz III nga tinuoray’ng miserbisyo sa mga water consumers sa Metro Cebu.

Kon ako lang ang pabut-on, gusto ko nga dili na unta ilisan si Atty. Daluz sa iyang katungdanan.

BARANGAY ELECTION

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with