Reformat

Kini ang akong gihangyo sa usa ka technician. Ang technician agi’g pagtuman akong hangyo ang nihimo dayon sa pag reformat sa akong laptop. Kini tungod kay hinay man kaayo ang dagan niini tingali kaha sa daghang mga mga files ingon man mga programs.

Hinuon taastaas na gyud pud tawon og kasinatian kining akong laptop. Apan sa dihang na reformat na kini, daghang mga files ang nangawala. Nipaspas man tuod kini apan nahanaw na pud ang uban apil na niini ang akong autocad nga program.

Wala koy laing nahimo gawas sa pagdawat sa kamatuoran nga wala na gyud ang ubang files. Kinhanglang sila i-delete aron maka-move on ang laptop sa iyang function ug speed ingon nga laptop.

Ingon ini usab ang atong kinabuhi. Sama sa laptop nagkinahanglan kita pag reformat labina kun mamahimong hinay na ang atong panaw sa kinabuhi. Unsay nakapahinay sa atong panaw ingon nga tawo?

Kini ang mga gihambing files nga kasagaran mga toxic files sa atong mga emotional baggage nga padayon natong gitipigan sa atong kahiladman bisan pa man kun wala na sila kinahanglana. Ang resulta nahimong depektoso ang tanan alang kanato. Ang tanan, nahimong malisud alang kanato labina kun maghisgot kita og pag move on sa umaabot.

Sa makadaghan nihimo kita og pag-detour sa atong panaw. Imbis moadto kita sa atong destino, nahimo kitang nitipas kay lagi wala kita kauyon sa gilatid nga dalan nga pagasubayon.

Ang maong pag-detour kun pagtipas mao man nuon ang nakapalangay og samot sa atong panaw padulong sa personal integration. Mao nga sa kaulahian nahimong mas gubot ang atong kinabuhi tungod kay nihimo kita og atong diskarte ug short cuts bisan pa man kun wala kinahanglana.

Lisud ang pag-reformat kay dunay mga kaugalingong hilig nga angayan natong i-give up for the better. Dunay mga tawo nga sama sa dahon ug sanga kinahanglan nga atong pul-ongan. Dunay mga tawo nga kinahanglang mahanaw aron mamahimong tunhay ang atong panaw kay ang uban kanila nahimo mang babag sa atong pagtubo ingon nga tawo. Ug kun dili kita makatubo nan, unsaon naman lang ang atong kaugalingong kalipay? Dili ba  mamahimong miserable ang tanan alang kanato?

Kini ang akong pag-ampo:

Lord grant me the serenity to accept the things I cannot change, the courage to change the things I can and the wisdom to know the difference! Dili paigo ang pag reformat lang sa bisan unsang bati, angayan lamang nga atong dawaton ang kamatuoran nga diha sa panaw anaa gyud ang mga kausaban…. Sakit lang gyud hinuon ang uban.