EDITORYAL — Kumusta ang Oplan Kontra Baha?

Sa miaging tuig, miari sa Cebu si Presidente Ferdinand Marcos Jr. para sa paglusad sa Oplan Kontra Baha nga ang tumong paglimpyo sa tanang mga sapa, mga imburnal, ug mga kanal nunot sa lapad nga mga pagbaha atol sa pagbunok sa ulan.

Sa pag-anhi niya dinhi, gitagalan ang maong kalihokan hangtud Agosto ning tuiga, o sa miaging buwan pa unta kini nakompleto o nahuman.

Apan makita nga hangtud karon, wala pa gihapon mahuman ang mga paglimpyo ug pagpaayo sa mga kanal, mga tampi sa mga sapa, estero ug tanang agianan sa tubig baha.

Dinhi lang gani sa Metro Cebu, wala gyud malimpyo ang tanang mga sapa, usa na niini kaning sa Barangay Mabolo o Mahiga Creek, kanang sa Guadalupe River, Bulacao River, Pari-an Creek ug daghan pa.

Barado pa gihapon ang pipila ka bahin aning mga sapaa tungod sa mga basura ug natigom nga mga lapok. Kinsa pa man diay ilang gipaabot para ni masugdan og trabaho?

Naa pa gihapoy nga heavy equipment nga padayung gakubkob sa mga sapa, samtang naay mga kanal nga ato pang pag-ari sa presidente barado hangtud karon wala gyud matarug.

Kaning mga kanal, dili mga dagko ug kasagaran naa ra sa mga barangay ug gagmay nga mga karsada. Apan wala gyud malimpyohi.

Nagpasabot lang nga palpak ang mga local government units sa tahas nga gihatag kanila sa presidente. Wala mahuman sa hustong panahon ang angay untang nahuman adto pang Agosto.

Kana lang daan maintenance sa mga kanal diha sa kabarangayan, dili man kana kinahanglan og heavy equipment, kinahanglan ra gyud na og kolektibong paglihok sa mga barangay officials ug sa ilang mga konstituwente kay sila may unang maapektahan.

Dili mahimong basulon ang nasudnong kagamhanan sa tanang mga nahitabo sa lokalidad kay naay mga lokal nga mga opisyal nga mao gyud untay angayan nga manguna sa paglihok.