Gipasagdan ra man

Kon midaghan man ang mga pagpamusil sa mga tunghaan nga gihimo ra sa mga tinun-an nga nayabag ang pangisip, midaghan usab ang mga abuso sa pagmaneho’g sakyanan nga ang uban gihimo sa mga driver nga way lisensya.

Kining duha ka mga isyu mahatagan unta og sulbad kon ang mga kawani sa kagamhanan nga gitugyanan sa gimbuhaton nagtuman pa sa ilang mga katungdanan.

Una, hisgotan nato ang padayong hulga sa pagpamusil nga gihimo sa mga tunghaan. Ang labing bag-o mao ang nahitabo sa Banga National High School sa South Cotabato nga mikalas og tulo ka kinabuhi.

Kon giestrikto pa sa paghiling ang mga bag sa mga tinun-an, ug rekisahon ang mga tinun-an sa dayon nilang sulod sa tunghaan, tingali maglisud ang maong tinun-an nga makadala og armas.

Lain pa nga angay’ng himoon unta. Ang mga maestra kinahanglang mohimo mata’g karon ug unya, og kinalit nga inspection sa mga bag sa ilang mga tinun-an sulod na sa ilang classrooms.

Nahinumdom ba kamo nga sa usa ka tunghaan sa Pinamungajan, Cebu dunay tinun-an nga nasakpang nagdala og 357 Magnum revolver kay gipakalitan man sa maestra pagsusi ang ilang mga bag?

Nindot kaayo nga sundon ang gihimo sa maong magtutudlo. Sigurado ko nga duna pay laing mahitabo nga pagpamusil nga himoon anha sa mga tunghaan, kay daghan na karon nga mga tinun-an nga motra’g nangayabag na.

Ang mga ginikanan sab niining mga bataa nagkuwang pagtudlo og disiplina. Angkonon nako nga kaniadto, duna ko’y duha ka armas, ug ang akong mga anak wa gyud makahilabot niini bisan kausa na lang.

Bisan ang paghikap sa armas wa nila kini himoa, kay gipahimangnoan nako sila nga silotan nako sila kon ila kining himoon. Disiplina ang kinahanglan.

* * *

Kabahin sa mga driver nga way lisensiya, ug abusado ra ba kaayong mopadagan, wa sila’y kahadlok kay unsaon, wa may mga tinugyanan sa balaod nga maghimo og checkpoint operations.

Ang mga sakop sa PNP Highway Patrol Group, sa nga’n ra kutob, ug wa gyuy pagpatrolya sa mga dapit sa kalungsuran. Ang mga polis sa lungsod dili gani ka makakita sa ilang lungsod kon maagi ka.

Mao kana ang rason nga kon moadto ka sa kalungsuran makakita ka og mga nag-drive og mga motor nga batan-on kaayo ug klaro nga way lisensya, apan abusado kaayo mopadagan.

Aw, tuod man, duha ka mag-agaw nangamatay sa aksidente ug napasok sila sa gikasugat nilang bus nga ilang gidasmagan kay mi-overtake man og sakyanan nga wa sa lugar.

Unsa may ikasulti nato sa mga ginikanan nila?