Inahan sa kasakit
MGA LAMAS SA KINABUHI - Fr. Rey Cui (Banat) - September 14, 2020 - 12:00am

Dinhi sa Sugbo bugtong ang Ronda lamang ang parokya nga nag-titular sa Inahan sa Kasakit.

Kining maong debosyon gikahadlokan sa ubang mahilig sa patuotuo tungod kay kun magdebosyon kuno niini magpas-an gyud og daghang mga pag-antos.

Karong mga panahona, ang tawo dili buot  og kasakit ug pag-antos. Kadaghanan nato buot mamahimong sayon ang tanan alang kanato.

Buot nato nga mamahimong dali ang tanan alang kanato. Dili kita buot nga mamahimong lisud ang tanan. Kay alang kanato usa ka dakong silot ang kalisud ug pag-antos.

Mao nga diha sa atong pagtinarong ug pagpaningkamot nga mamahimong husto ang atong pagkinabuhi makapangutana gayud kita kun nganong paantuson pa man gyud ta.

Ug kun gikinahanglanon ba gyud nga ang tawo mag-antos? Pangutana kini nga bisan gani ang kakaraanan naningkamot pagtubag.

Apan kabahin gyud sa kinabuhi ang pag-antos. Sama sa inahan nga si Maria Santisima nga nahimong nitipig sa mga pag-antos niya samtang siya anaa sa tiilan sa krus nisud-ong sa iyang anak nga si Jesus nga nagtinga ug nagpinal niadtong tungora.

Walay bisan usa ka pulong nga nalibkas sa usa ka inahan. Tingali naghilak siya nga nagsud-ong sa iyang anak nga hapit nang mamatay. Lisud gyud kaayo dili ba?

Wa ko mag-ingon nga kinahanglang mamahimo kitang submissive na lang gyud sa kasakit labina sa mga higayon sa atong mga problema.

Dunay mga pag-antos nga kinahanglanon ug dunay mga pag-antos nga tinuyoan.

Ang babaye nga nahimong buntis nagkinahanglan og pag-antos kay pinaagi lamang niini ipahimugso ang laing kinabuhi nga sama sa inahan dunay kaugalingong destino. Kay ang maong pag-antos resulta man sa matang sa kinabuhi nga gipili.

Ang gibug-aton sa krus wala man mag-agad sa krus mismo kondili sa matang sa kinaiya nga atong gipakita sa matag higayon nga kita mopas-an sa atong krus.

Kun ato kining dad-on sa mug-ot nga disposisyon kini mamahimong bug-at gyud alang kanato.

Apan kun dad-on nato kini uban ang kalipay ug kalinaw, nan, mamahimo kining gaan ug dali alang kanato. Kay kuyog man gyud nato ang Dios nga mopas-an niini.

Hinumdomi nga hawa kaniya, wala kitay mahimo. (Jn. 15;5). Mao nga dili kita mabalaka nga magdebosyon sa Mater Dolorosa kay si Mama Maria nagtudlo man kanato nga ang paghangop sa krus ug pag-antos kabahin man sa panaw padulong sa kinabuhing santos. 

RONDA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with