Sara para China
Abunda ang mga ebidensiya nga si Bise Presidente Sara Duterte nagsuporta sa China. Iyang mga sulti ug mga aksiyon klaro nga nipabor sa China. Ang imbestigahon na lang mao nga kon igo ba lang nigamit sa iyang kagawasan sa pagpadayag. O nakigkonsabo na sa pag-ilog sa atong nasudnong teritoryo.
Ubos sa demokrasya, si VP Sara gawasnon nga mosukwahi sa baruganan sa gobyerno sa pagsukol sa pagpangilog sa China sa West Philippine Sea (WPS). Pero nakalapas siya sa balaod kon mapamatud-an nga nitabang na sa China sa pagsabotahe sa atong nasudnong interes.
* * *
Kon gusto lang si VP Sara nga mosukwahi sa baruganan ni Presidente Ferdinand Marcos Jr. sa pakig-alyansa sa Estados Unidos ug ubang kanasuran pagbatok sa pagpanghasi sa China sa WPS, aron pagkumbinser sa iyang mga dumadapig nga sayop ang foreign policy sa administrasyon, walay maka-kuwestiyon niya.
Mameligro hinuon nga kasilagan sa makabungog nga mayoriya sa mga Pilipino nga nideklarar sa daghan na uyamot nga nasudnong surveys sa ilang pagbarug sa pagpanalipod sa WPS ug sa ubang bahin sa Pilipinas nga gustong ilugon sa China ug ubang mga langyaw.
* * *
Labing uwahing timaan sa pagsipsip ni VP Sara sa China mao ang iyang pagkopya sa niaging semana sa propaganda sa Chinese Foreign Ministry nga nihingalan sa Pilipinas, bisan maoy biktima sa ilang water cannons, flares ug papamangga og mga barko sa WPS, nga troublemaker sa Southeast Asia.
Kinakusganong ebidensiya ang makabungog niyang pagpakahilom batok sa pagyatak sa China sa international law, apil nang iyang gipirmahan nga United Nations Convention on the Law of the Sea (UNCLOS).
* * *
Hinaot nga paspasan sa intelligence community ang imbestigasyon, nga walay sagol nga pamolitika, sa tinuod nga baraha ni Sara: Gawasnon bang iyang baruganan o nahalin na sa China; nag-negosyo ba lang og banana chips ang iyang kompaniya nga Cale88 Foods Corporation o nahimo nang imbudo sa nagbaha nga mga suburno sa pag-impluwensiya sa mga panghitabo apil nang umaabot nga eleksiyon sa 2028.
Hinaot nga makahukom nang mayoriya sa mga Pilipino nga mas importante kay sa politikanhong bugno ang gugma sa nasud. Ug ang pagpanalipod sa interes sa umaabot nga kaliwatan. Nga nagsalig sa adunahang katigayonan sa WPS.
* * *
- Latest
