EDITORYAL - Bulahan ang mga Pilipino

Bulahan kaayo ang mga Pilipino  tungod sa pagkabuwag-buwag sa mga isla niini ug nalibutan sa kadagatan ug layo sa mga silingang mga nasud.

Natural kini nga barriers o babag. Dili dali nga makatabok-tabok kung dili moagi sa dagat o kung dili mosakay og abyon.

Usa sab ni sa rason nga dali rang makontrol kung dunay mga outbreaks sa mga sakit sa mga hayopan o mananap kay puyde ra mopatuman og border control sa mga pantalan ug mga kabaybayonan.

Laing bentaha niini, bisan sa kapaspas na karon sa komunikasyon tungod sa internet, dili basta-basta makakatap ang mga ideya, mga politikanhong kalihokan, kagubot, tension, o kasamok.

Dali ra makontrol sa mga lokal nga otoridad ang ilang mga populasyon ubos sa ilang mga hurisdiksyon, ilabi na nga usa sa mga kinaiya sa mga Pilipino pag-abot sa politika mao ang pagkalunlon nga tigsuporta sa ilang mga lokal nga lider, sa laktod dali rang pasabton ug pasundon.

Gawas pa niana, dunay demokrasya sa Pilipinas, makapadayag sa ilang mga sentimento ang mga tawo kung gusto nila, basta dili lang momugna og kasamok nga makabalda o makadisturbo na sa uban.

Ebidensya ani katong nahitabo sa EDSA Revolution niadtong 1986, pwerte na gubota sa Manila, pero sa ubang mga lugar walay kagubot nga nahitabo.

Gawas lang sa mga dagkong mga siyudad sama sa Cebu City ug Davao  City diin daghang mga tawo nga nagsubay sa mga panghitabo sa nasud.

Sa miaging adlaw, Sabado, pwerteng gubota sa Uropa ilabi na sa mga nasud sa France, Belgium, Germany ug Italy tungod sa pagprotesta sa mga kabataan ilabi na mga immigrants didto.

Ang politikanhong kalihokan sa mga protesters sa France , paspas kaayong nitakod sa ilang mga silingang nasud.  Niresulta kini sa looting, pagkaguba ug pagka-alkanse sa mga balay patigayon.

Tungod kay kanang mga nasura, bagis ray utlanan ug dili sab parehas og kinaiya sa mga Pilipino ang mga tawo, tungod sa kadaghan sa klase-klaseng nasyon ang naglangkob sa mga immigrants didto.

Busa, kinahanglang mamentinar kini dinhi sa Pilipinas bisan unsa pang matang sa kaguliyang mapa politika man o may kalabotan sa nasud.

 Kay walay laing maapektahan sa kagubot kondili kita ra gihapong mga Pilipino.