Pa-victim

Tan-awa ra gud unsa ka maro niining embahador sa China nga si Jing Quan.

Human sa iyang swabe nga panghulga dihang siya miingon nga angayang magpasalamat ang Pilipinas nga wala gyud mogamit og pwersa ang China tungod kay kun ilang gubaton ang atong nasud sigurado kunong sayon ra nila kining mapildi.

Karon daw siya nay biktima nga gitabangan sa mga senador ug kongresista nga wala makaayon sa iyang pamahayag.

Gikan sa usa ka embahador sa nasud nga dunay kasamtangang panagbangi sa teritoryo sa atong nasud ang maong pamahayag maisip nga pagpanghulga.

Apan dihang miani og dili maayong reaksiyon gikan sa mga opisyal sa Pilipinas ang iyang pamahayag dali niyang gibaliktad ang sitwasyon.

Ang mga kongresista ug senador na maoy iyang gipasanginlang nanghulga ug burukinto batok sa China tungod kay nanawagan kini nga ideklarar siya nga persona non-grata dinhi sa Pilipinas.

Dili man ang China maoy punterya sa mga senador ug kongresista kun dili si Quan mismo nga labihan ka arogante ug dili kinaiya sa usa ka diplomat ang iyang batasan.

Tingali mas makatabang pagpalambo sa relasyon sa Pilipinas ug China kun ilisan ang ilang embahador og desente ug dili barumbado.

Husto ang mga senador ug kongresista nga nagtinguha pagdeklarar ni Quan nga persona non grata tungod kay dugay ra niyang giabandonar iyang papel isip embahador sa China dinhi sa Pilipinas.

Inay magsilbi siyang taytayan aron mapalambo ang relasyon sa duha ka nasud bisan pa sa panagbangi sa teritoryo nahimo naman hinuon siyang instrumento aron sugnoran ang tensiyon tali sa duha ka nasud.

Bisan kanus-a wala mahitabo ug sigurado ko nga di gyud  manghagit og gubat ang Pilipinas ni bisan kinsa sa iyang mga silingan labaw pa sa usa ka gamhanang nasud sama sa China.

Apan wala sab ni nagpasabot nga talawan ug pasagdan nalang sa Pilipinas nga ilogon ang teritoryo niini. Dili pagpanghagit og gubat ang pagbarog sa imong katungod.

Alang sa mga Pilipino, labi pa sa mga opisyal sa gobyerno nga nagtuo nga sayop ang pagpanalipod sa katungod ug interest sa nasud atubangan sa mas gamhanan nga China, wala moy katungod nga manangkon nga usa ka Pilipino.

Ang kagawasan nga atong natagamtaman karon bunga sa sakripisyo ug dugo sa unang mga Pilipinong bayani nga nakigbatok sa mga langyaw nga buot mosakop sa nasud.