Gubat hutdanay?
Nagkapuliki ang mga Duterte og panagang sa nagkadungan nga mga imbestigasyon sa gobyerno sa mga pasangil batok nila:
• Impeachment trial ni Bise Presidente Sara Duterte nga mosentro na sa hangtod sa P1.5 bilyones nga katigayonan nga wala ideklarar sa iyang statements of assets, liabilities and net worth (SALNs); Kasong kriminal nga grave threats sa Quezon City Regional Trial Court tungod sa iyang hulga pagpapatay nilang Presidente Ferdinand Marcos Jr., First Lady Liza Araneta Marcos ug kanhi House Speaker Martin Romualdez;Kasong plunder sa Ombudsman tungod sa pasangil nga iyang gibolsa ang P612.5 milyones nga confidential funds sa Office of the Vice President ug Department of Education;
* * *
• Tax audit sa Bureau of Internal Revenue batok niya, sa iyang bana nga si Mans Carpio ug ilang mga kompaniya;Inspeksiyon sa National Bureau of Investigation sa gidudahang undervaluation ug misdeclaration sa 121 ka real properties sa mga Duterte Davao, apil nang 24 nga gilista ni VP Sara sa iyang SALNs; ug Imbestigasyon sa National Security Council, National Intelligence Coordinating Agency, Intelligence Service of the Armed Forces of the Philippines ug ubang intelligence agencies sa pasangil nga gibayran sa China og minilyon ka pesos si VP Sara pinaagi sa iyang kompaniya nga Cale88 Foods Corporation ug Tapang at Malasakit Foundation bugti sa iyang pagpakahilom sa pagpanghasi sa West Philippine Sea.
* * *
Sa usa ka bahin, sayon ang pagpasangil nga gigamit na sa administrasyon ni Presidente Ferdinand Marcos Jr. ang tanang ahensiya sa gobyerno aron sa pagseguro nga mapalagpot sa puwesto ug dili nang kadagan si VP Sara ug walay Duterte, Baste o Pulong, nga makadagan pagka presidente puli niya sa 2028.
Sa pikas nga bahin, mapasanginlan nga inutil ang gobyerno kon pasagdan lang ang dugay nang gipasangil nga mga krimen batok sa mga Duterte tungod sa kalapad sa ilang politikanhong base sa Mindanao ug Kabisay-an.
Gawas pa, mahimong nakaamgo nang administrasyong Marcos nga wala silay laing kapilian: Kon makabalik ang mga Duterte sa Malakanyang, dako ang kahigayonan nga sama sa kaliboan ka mga biktima sa laktod nga pinatyanay sa drug war ni kanhi Presidente Rodrigo Duterte mag-una sila sa lista sa labing unang tokhangon.
* * *
- Latest
