EDITORYAL - Pagtugot sa backride

Daghan ang nalipay niining paghatag og pagtugot sa gobiyerno nga makapaangkas na og balik ang mga adunay motorsiklo. Kini bisan pa man og limitado lang sa managtiayon o managkapuyo.

Ang pagdili sa pagpaangkas sa motorsiklo gipatuman sa Inter-Agency Task Force on Emerging Infectious Disease tungod sa higpit nga pagpatuman sa ‘social distancing’ nga usa sa mga health protocols.

Tungod sa higpit nga lockdowns, gisuspenso ang tanang matang sa tradisyonal nga pasaheroan, ug bisan dunay piniling mga bus ug e-jeepneys nga nakabiyahe limitado gihapon kini.

Apan ang ‘social distancing’ nasobrahan kay bisan ang magtiayon nga magdulog og katulog ug mag-uban sa balay gidid-an nga mag-angkasay sa ilang motor, butang nga gisaway sa katawhan.

Sa pagkakaron gitugotan na kini sa DILG apan kinahanglang adunay barrier o mag-uwang taliwala sa drayber ug angkas ug kinahanglan gihapon silang magsuot og facemask ug mga safety helmets samtang nagsakay.

Maayo nga nasabtan sa gobiyerno nga dunay mga lugar nga diin ang motorsiklo lang maoy epektibong matang sa transportasyon paghakot og tawo o mga produkto.

Pinaagi sab niini, ang mga asawa nga wala na makatrabaho ug nangatanggong sa mga panimalay makatambong na og balik sa pagpanarbaho o makapangita og panginabuhian.

Sa samang paagi, makatabang kini og gamay sa mga kompanya nga nagpahatud-kuha sa ilang mga babayeng trabahante.

Pipila kanila aduna untay motorsiklo ang mga bana apan gumikan sa pagdili sa pagpaangkas kinahanglang migastos ang ilang kompanya sa pagtagana og sakyanan aron makapadayon sa ilang operasyon.

Karon human sa pipila ka bulan nga hinangyoay dili lang gikan sa mga nanag-iya og mga motorsiklo, kondili lakip na sa mga lokal nga mga opisyales natugotan na kini.

Apan bisan magtiayon o managkapuyo ang mga sakay kinahanglan gihapon silang magbutang og barriers. Ambot kun unsay lohiko niini, apan maayo nalang kini nungka sa pagdili gyud sa pagpaangkas.