Junket sa mga mayor
TIKDOL SA PORDOY - John Rey Saavedra (Banat) - January 12, 2018 - 12:00am

Dili lang sab tingali mga sakop sa Gabinete, mga dagkong ahensiya ug mga GOCCs ang lili-on ni Presidente Duterte nunot sa iyang kampanya pagtangtang sa mga tag-as nga opisyal nga magsige lang og laag (junket) sa gawas sa nasud.

Apan nagtuo ko nga nasayod na si Duterte nga lakip na ang mga gobernador ug mayor sa mga siyudad ug munisipalidad, ang angayan usab nga lili-on kay nagsige na lang og gawas sa nasud, biniyaan ang ilang trabaho.

Dili lang trabaho nga mabiyaan ang rason nganong gi-estrikto ni Duterte ang pagpunay og adto sa abroad sa mga opisyal sa gobiyerno – lokal, o nasyonal. Usik-usik usab kini sa kuwarta kon ang paggawas sa usa ka opisyal gastohan sa iyang opisina aron kunohay motambong og conference, apan junket ra gyud.

Bisan dili gastohan sa iyang opisina, aduna gihapo’y mga binuang nga angayan likayan nianang pagsige og adto sa abroad sa mga opisyal.

Pananglit ang tiket sa eroplano, mahal kaayo kon lukaton. Unya pakuyogon pa gyud ang pipila ka miyembro sa pamilya. Kon pabayran sa gobiyerno, luoy ang mga magbubuhis. Kon dili pabayran sa gobiyerno, asa man og ipalit og tiket ang opisyal? Mao nga mangurakot na lang.

Lahi ra hinuon kini sa mga opisyal nga negosyante daan ug aduna na’y minilyon nga pundo sa bangko nga mahimo nilang gamiton alang sa personal nilang mga lakaw human makapananghid sa mother office nila.

Apan kanang mga mayor, gobernador, kongresista, ug uban pa nga adunay kuyog nga mga negosyante? Sigurado nga librehon sila sa ilang plete ug akomodasyon. Dili ba kurapsiyon kini?

Adunay mga negosyante nga nakakuha og pabor sa usa ka buhatan sa gobiyerno. Agi og pahalipay, ang labaw sa maong buhatan sa gobiyerno iyang librehon sa plete ug akomodasyon ngadto sa abroad. Seguro ko nga mao usab kini nga inpormasyon ang nakaabot sa dunggan ni Duterte.

Laing binuang mao kining local junket, kon laag-laag sa mga opisyal sa ubang probinsiya kunohay kay motambong og conference o meeting. Unya dinaghan ra ba. Kusog kaayo niini ang rehiyonal nga liga sa mga kapitan, konsehal, mayor, bise mayor, gobernador, ug mga bise gobernador.

Dako kaayo og gasto ang gobiyerno para lang sa ilang plete sa eroplano ug puyo sa hotel, apil pa ang bayad sa kaon ug venue. Apil ning binuanga ang “lakbay-aral” nga wala gyuy gibuhat gawas sa pagbakdoybakdoy sa lugar nga gibisitahan.

Hinuon, kining lakbay-aral mas manghod lang kini nga problema kay sa nianang international junket sa mga opisyal. Apan usbon ko, apil ang mga mayor, nagsige og gawas sa nasud. Aduna ra bay mayor nga wala gyuy negosyo pero nagsige lang og abroad.

 

Philstar
Facebook
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with