Ang atong panahon (1)

Kun ato lang kipaton o kaha ilingiw ang kamatuoran, sa mga panan-aw nato sa panahon, mahimong wala tay mabatyagan nga kausaban. Angay tang maniid sa dagan niini, aron sab may ideya kita nga asa ug unsaon nga mohaom kitang mabuhi sa karon. Ang mga nangaging panahon, mao na lay salamin nga kakuhaan nato'g leksyon sa kinabuhi  aron kini kapahimuslan sa atong panahon.

Kaniadto tag-as kaayo'g pangedaron ang mga tawo nga sagad halos moabot kapin kon kulang 1ka libo. Apan sa nagdagan ang panahon, inanay nagkamubo ang edad sa tawo, dihang gisupak ang kabalaoran sa Dios kaniadto, nga dili mokaon og karne. Magpiyesta pang saulogon nga may potaheng karne.

Sa atong panahon  nag-unang problema kini sa kalibutan, mga tag-as na'g lebel sa kolesterol, daghang nangasakit kay mahiligon sa pagkao'g karne. Hasta ang edad, dili lang kay nimubo ang uban kutob ra gyud sa tagoangkan, wa kagawas. Kadaghanan maglisud na makaabot sa 80-100 ang edad.

Kaniadto, ang tawo tag-as sab kaayo'g buhok ug bungot, nga sagad mosangyad sa yuta, nga isambilay na lang sa abaga aron komportable sa paglihok. Dili kay wa silay gunting kay mokusog ang tubo sa buhok kun putlan.  Duna sab kini sa atong panahon, mga ermitanyong lugosay makaabot 100 edad  tungod sa spirituhanong tahas o panaad, nagpatag-as sab sila og buhok ug bungot nga inigbarug makatugkad na gani sa yuta, mahimo na ning kortehan.  Niining atong panahon, bata pa gani daginuton na'g buhok magkalisud na-opaw na. Kun imong putlan monipis hinuon nga manglarot, unsaon binutangan ma'g kemikals, labina'g tinaon mura'g badjao, aw kaamgid na gyud tan-awon.