Miubos ug misaka ang mga kabus

Miubos og usa ka porsiyento ang gidaghanon sa mga kabus sa nasud. Kini basi sa gipahigayon nga pagtoon sa Social Weather Stations (SWS) sa buwan sa Marso ning tuiga nga ilang gipagawas niadtong miaging adlaw nga Miyerkulas.

Nasuta sa SWS nga miubos ngadto sa 46 porsiyento  o 12.9 milyones ka pamilya ang gidaghanon sa mga kabus lukop nasud kon ikomparar sa ilang gihimong pagtoon niadtong Disyembre 2023.

Sa gihimong pagtoon sa SWS niadtong Marso miabot usab ngdto sa 33 porsiyento ang miangkon nga anaa sila sa borderline ug 23 porsiyento ang miingon nga dili sila kabus.

Niadtong buwan sa Disyembre 2023 nga pagtoon sa SWS miabot sa 47 porsiyento ang gidaghanon sa mga pamilya lukop nasud ang miangkon nga sila kabus, 33 porsiyento ang miangkon nga anaa sila sa bordeline ug 20 porsiyento ang miingon nga dili sila kabus.

Sa buwan sa Marso nga pagtoon sa SWS ang adunay pinakadaghan nga kabus ang anaa sa Visayas, gisundan kini sa Mindanao, Balance of Luzon o Luzon gawas sa Metro Manila ug Metro Manila.

Sa maong pagtoon nasuta nga miubos ang gidaghanon sa mga kabus nga pamilya sa Mindanao ug Metro Manila.

Sa mao gihapon nga pagtoon nasuta nga 33 porsiyento nga pamilya ang mikonsiderar sa ilang kaugalingon nga kabus sa pagkaon basi sa tipo sa ilang pagkaon, 36 porsiyento ang miingon nga anaa sila sa borderline ug 41 porsiyento ang miangkon nga dili sila kabus sa pagkaon.

Ang resulta sa pagtoon nga gihimo sa SWS dako kining hagit sa mga pangulo sa nagkalain-laing mga lokal nga kagamhanan sa Visayas area.

Hinaut nga hatagan og pagtagad ug himoon nga basihanan sa mga lokal nga kagamhanan sa Visayas area sa ilang mga ipatuman nga patakaran mahitungod sa pagpakgang sa pagdaghan sa mga kabus.