Feeding Program mas gipalapdan karong tuiga

CEBU, Philippines — Nakompleto na sa Department of Social Welfare and Development sa Central Visayas (DSWD-7) ang Program Implementation Review (PIR) alang sa Supplementary Feeding Program (SFP) ug nagsugod na sa mga pagpangandam alang sa gipalapdan nga pagpatuman niini sa 2026.

Gipahigayon virtually pinaagi sa Google Meet gikan Mayo 25 hangtod Hunyo 11, ang kalihokan nagsusi sa implementasyon sa programa alang sa Calendar Year 2025 ug oriented local government unit (LGU) partner para sa sunod nga cycle.

Atol sa opening program, si DSWD-7 Regional Director Shalaine Marie S. Lucero miingon nga ang Supplementary Feeding Program nagpabilin nga usa ka investment sa kaugmaon sa kabataang Pilipino ug kini nagsuporta dili lamang sa nutrisyon kondili sa kinatibuk-ang kalamboan sa mga bata.

Ang review sessions giorganisar sa legislative district. Sa Bohol, gipahigayon ang mga sesyon gikan Mayo 25 hangtod Hunyo 2 sa tulo ka distrito sa lalawigan. Samtang sa Sugbo, ang review naglangkob sa tanang pito ka distrito pinaagi sa mga sesyon nga gihimo gikan Hunyo 3 hangtod Hunyo 11.

Isip kabahin sa review, ang DSWD-7 miila sa mga local government units nga nihimo og talagsaong performance sa pagpalambo sa nutritional status sa mga bata, pagsumite dayon og liquidation reports, ug pagsunod sa mga kinahanglanon sa milk feeding program. Sa laing bahin, si SFP regional focal person Ma. Romilene C. Padilla mipadayag nga ang inisyatiba labaw pa sa paghatag og pagkaon sa mga bata.

Matud niya, kini nagtumong sa pagsiguro sa ilang maayong nutrisyon ug kinatibuk-ang pagtubo samtang gipalig-on ang adbokasiya alang sa maayong nutrisyon sa matag lokal nga panggamhanan. — /MEL (BANAT NEWS)