Hydroponic system gisuportahan sa DA

CEBU, Philippines — Ang Department of Agriculture-Central Visayas (DA7), pinaagi sa National Urban and Peri-urban Agriculture Program, opisyal nga ni-turn over sa usa ka greenhouse unit nga adunay hydroponic system ngadto sa PEBA Hydroponics Inc., usa ka pribadong kompaniya nga nakabase sa Lapu-Lapu City.

Ang proyekto, nga nagkantidad og P1,130,079.03, nagtumong sa pagpausbaw sa agrikultura sa urban areas, ilabina sa mga luna nga limitado ang yutang tamnanan. Agig pagsuporta usab kini sa tumong sa DA nga mapalambo ang produktibidad ug madugangan ang kita sa mga mag-uuma taliwala sa gamay nga lugar-tamnanan sa syudad, matud ni DA7 Regional Technical Director, Engr. Cirilo N. Namoc.

Ang PEBA Hydroponics Inc. nag-operate og greenhouse ug usa ka indoor growing area diin ilang gi-cultivate ang nagkalain-laing mga utanon ug herb sama sa lettuce, barley, kale, ug basil.

Sa miaging buwan lang, ang PEBA nakaangkon og sertipikasyon ubos sa Philippine Good Agricultural Practices (PhilGAP), dugang nga nagpamatuod sa ilang pasalig sa dekalidad ug malungtarong gawi sa pagpanguma.

Ang DA7 miingon nga ang bag-ong gi-turn-over nga pasilidad gilauman nga mopalapad sa ilang produksiyon ug makatabang sa nagkadako nga panginahanglan gikan sa mga lokal nga resort ug mga dining establishment.

Sa laing bahin, ang lokal nga kagamhanan sa dakbayan sa Lapu-Lapu nipadayag og hugot nga suporta alang sa kalamboan sa agrikultura ug pangisda sa dakbayan.

Si mayor-elect ug kasamtangang kongresista, Ma. Cynthia ‘Cindi’ Chan nipaambit nga nagplano sila nga sundogon ang urban gardening initiative sa ubang barangay aron dili lang mapalambo ang food sustainability kon dili makamugna usab og opurtunidad sa trabaho alang sa mga Oponganon.