Kapin 400 Delta variant case na-detect sa DOH

CEBU, Philippines — Dugang kapin 400 ka Delta variants sa Covid-19 ang na-detect sa Department of Health (DOH), University of the Philippines - Philippine Genome Center (UP-PGC), ug sa University of the Philippines - National Institutes of Health (UP-NIH) kagahapong adlawa.

Sumala pa sa gipagawas nga pamahayag sa DOH, gawas sa 466 ka Delta (B.1.617.2) variant cases, duna say 90 Alpha (B.1.1.7) variants, 105 Beta (B.1.351) variants, ug 41 P.3 variants ang na-detect sa labing uwahing batch nga gipaubos sa genome sequencing.

Ang maong batch sa mga specimens nga gipaubos sa sequencing 746 ka samples gikan sa 62 ka nagkalain-laing collecting institutions ug Centers for Health Development (CHD) sa nasud.

Ang Delta variant nga giingong mas paspas makatakod nga bag-ohay na-detect (466), 442 niini local cases, 14 ang Returning Overseas Filipinos (ROF), ug 10 ka kaso ang padayong giberipika kun diin gikan.

Sa 442 local cases, ang 201 niini gikan sa National Capital Region, 69 sa Central Luzon, pito sa Cagayan Valley, 49 sa CALABARZON, 14 sa MIMAROPA, upat sa Bicol Region, 52 sa Western Visayas, 19 sa Central Visayas, unom sa Northern Mindanao, 11 sa Davao Region, pito sa SOCCSKSARGEN, ug tulo sa Ilocos Region.

Apan subay sa case line list, usa nalang nila ang aktibong kaso, walo ang namatay samtang 457 ang nangaayo na.  Ang uban padayon pang gipaubos sa balidasyon sa nagkalain-laing regional ug local health offices.

Sa pagkakaron ang nasud duna nay kinatibuk-ang 1,273 ka kaso sa Delta variant.

Giklaro hinuon sa DOH nga nagkinahanglan pa sila og dugang mga ebidensiya nga makasuporta sa pagduda nila nga nikatap na sa mga komunidad sa nasud ang Delta variant.

Apan sa Region IV-A ug NCR duna nay community transmission sa Delta variant, base kini sa naobserbahan nilang daghang kaso sa maong variant ug uban pang indikasyon.

Hinuon matud pa sa DOH, ang gobiyerno apil na ang mga LGUs nihimo na og mga lakang nga sama og naa na gyuy Delta variants sa ilang mga lugar. Subling gipanawagan sa DOH ang aktibong pagpangita, agresibong contact tracing ug testing, paubsan ang interval sa detection and isolation/quarantine, pangusgan ilang mga estratehiya, vaccination ug estriktong pagpatuman sa minimum public health standards aron mapakgang ang pagkatap nini.