Duha ka luna sa probinsiya gamiton alang sa SUGBUCAS centers

CEBU, Philippines — Gipirmahan ni Cebu governor Gwendolyn Garcia ang duha ka usufruct agreement tali sa Department of Health Central Visayas (DOH 7) ug sa Vicente Sotto Memorial Medical Center (VSMMC) alang sa pagpagamit sa duha ka propedad sa Probinsya alang sa dugang Sugboanong Bagong Urgent Care and Ambulatory Services (SUGBUCAS) Centers niini.

Ang hepe sa VSMMC nga si Dr. Gerardo M. Aquino, Jr. mipirma sa lima ka tuig nga kasabotan uban ni Garcia atol sa usa ka seremonyas nga gihimo niadtong Abril 26.

Usa sa mga luna nga gamiton adunay sukod nga 291 metro kwadrado samtang ang usa moabot sa 43,324 metro kwadrado ang sukod.

Ang SUGBUCAS usa ka programa sa Kapitolyo pinaagi sa usa ka tripartite collaboration sa Cebu Provincial Government, DOH 7 ug VSMMC nga nagtinguha nga hingusgan ug mapalambo pa ang kapasidad sa serbisyong panglawas sa SUGBUCAS Centers, kini aron momenus na ang referrals ug kahuot sa mga emergency room ug outpatient departments sa mga tambalanan sa dakbayan sa Sugbo. Ubos sa maong programa ang DOH 7 ug VSMMC mopadala sa mga medical professionals ngadto sa SUGBUCAS Centers alang sa ambulatory ug dinalian nga care services.

Ang ubang serbisyo ubos sa maong programa mao ang primary care, emergency ug ambulatory care, surgical services, specialized procedures sa mga pasyente nga adunay chronic diseases, epidemiology ug surveillance, lakip na ang health emergency ug response.

Ang pagpinirmahanay sa kasabotan gisaksihan ni Dr. Stanley Caminero, VSMMC chief administrative officer Atty. Paul Gino Lopez, ug mga doktor sa VSMMC niadtong Abril 26. — /MEL (BANAT NEWS)