Ika-459th Kaplag gibuksan kagahapon

CEBU, Philippines — Usa ka mabulokon og dako nga selebrasyon ang gipahigayon sa ika-459th Kaplag sa Archdiocesan Shrine of San Nicolas De Tolentino uban sa Cebu City Government kagahapon.

Nasayran nga unom ka barangay ang nagtigi sa Kaplag Festival 2024 nga gilangkuban sa Barangay Pasil, Calamba, Pahina San Nicolas, Duljo Fatima, Sawang Calero ug San Nicolas Proper.

Sa wala pa sugdi ang street dancing competition adunay gipahigayong mubo nga programa nga gipangulohan ni Monsignor Roger Fuentes, team moderator sa Team of Pastor sa parokya ug Mayor Michael Rama uban sa pipila ka opisyales sa siyudad.

Gibendisyonan una ni Fuentes ang mga contingent ug gisunod ang pagbukas ni Rama sa opisyal nga Kaplag 2024.

Ang mga contingent nga niapil sa street dancing niliyok kini diha sa pipila ka mga barangay.

Hangtud sa pagsulat niining balita nagpadayon pa ang ritual showdown competition alas 8:00 sa gabii human sa Santos nga Misa ni Archbishop Jose Palma uban sa mga kaparian sa Archdiocese of Cebu

Matud ni Palma nga mahimo man ang Sugbuswak sa Archdiocese of Cebu north ug south apan usa lang gihapon ang pagsaulog sa Fiesta ni Señor Santo Niño.

Si Palma niawhag sa pag-ampo diin sa panaw sa Ginoo nakaplagan ang Santo Niño ug nakita sa tanan ang dalan nga nagdala og kahulogan sa kinabuhi.

Dugang ni Palma nga ang Santo Niño maoy nangita kanato alang sa atong panaw padulong sa amahan. — /BDB (BANAT NEWS)