CAD: Danyos sa pananom niabot na sa 50 porsyento

CEBU, Philippines — Niabot na sa 50 porsyento ang danyos sa mga pananom sa mga mag-uuma sa bukirang bahin sa Dakbayans a Sugbo tungod sa El Niño.

Kini ang gibutyag sa pangulo sa City Agriculture Department (CAD) Joelito Baclayon  niadtong Biyernes.

Matud ni Baclayon nga padayon pa ang gipahigayong report sa danyos apan wala pa'y gihatag nga conversion o kantidad sa gidak-on sa danyos.

"Basta man summer gani, ang atoang mag-uuma man gyud mismo, mo menos gyud na ilang pagtanom kay dependent man ta sa ulan, basta kay 50% na gyud ang naapektohan", matud ni Baclayon.

Ang area nga cultivated sa dakbayan niabot ngadto sa 8,913 nga ektarya apan ang kinatibuk-ang farming area niabot sa 16,000 ka ektarya.

Sa pagkakaron, adunay 10,976 ka mag-uuma ang anaa sa 28 ka bukirang barangay sa dakbayan.

Ug kong magpadayon ang grabeng kainit ang uwahing maigo mao ang Barangay Sudlon ang labing dako nga tamnan sama sa kamatis, repolyo ug lettuce.

Sa 40 ka irrigation system sa NIA, 21 nalang niini ang mogana pa ug apektado usab ang mga kaugalingong irrigation system sa mga mag-uuma tungod sa grabeng kainit.

Si Baclayon nagkanayon nga gihingusgan nila ang insurance sa mga pananom.

"Naay mga insurance ilang mga tanom ug kaning ilang pagpananom mismo", matud ni Baclayon.

Gibutyag ni Baclayon nga naghatag na usab sila og ayuda ngadto sa mga farmer's association sama sa hose, water containers, pumps ug ubang farming tools.

Nihatag na usab og P5,000 nga loan sa mga mag-uuma ang LGU sa dakbayan pinaagi sa Food Security Loan Program nga mahimong bayran sulod sa duha ka tuig nga walay interest.

Nasayran nga nikabat ngadto sa P75 milyones ang pundo sa programa ug wala kini labot sa calamity fund tungod kay gigahin kini sa regular nga programa sa mga mag-uuma ug mapagawas na ang pundo sa sunod buwan.

Kinahanglang mga accredited ang mga mag-uuma nga mamahimong moapil sa programa ug kinahanglang mosumitir sa ilang farming business plan.

Gibutyag usab ni Baclayon nga padayon ang ilang caravan sa mga bukirang barangay.

Nangayo ang CAD og P80 milyones nga pundo aron pagbatok sa El Niño diin ang maong pundoa kuhaon gikan sa calamity fund.

Niadtong Marso 27, 2024 giaprobahan sa konseho sa siyudad ang resolution nga nagpaubos sa 28 ka bukirang barangay sa Dakbayan sa Sugbo sa state of calamity tungod sa El Niño.

Ug niadtong Abril 1, 2024, si Cebu City Mayor Michael Rama nideklara usab og krisis sa suplay sa tubig nga dala sa El Niño. — /BDB (BANAT NEWS)