Talisay mas gamay og gasto sa Sinulog
CEBU, Philippines — Gidak-an ra si Talisay City Mayor Eduardo Gullas sa P6.7 milyones nila nga gasto sa ilang contingent sa Sinulog 2018.
Iyang ipatawag si Edgar Mabunay, ang city budget officer, aron ipasabot kaniya nganong ingon ana kadako ang ilang gastuhon karong tuiga.
Hinuon nibutyag si Gullas nga naabot sa maong kantidad ang ilang gastuhan gumikan sa ilang contingent nga adunay dul-an usa ka libo ka tawo.
Siya nagkanayon nga halad gyud kini sa Balaang Bata ang ilang tumong ug gawas pa niana ilang panalipdan ang ilang dungog nga maoy kampiyon sa Sinulog sa Kabataan sa Lalawigan sa niaging tuig.
Samtang si Mabunay niklaro nga gamay ang kantidad nga ilang igasto karong tuiga tungod kay kaniadto niabot man sila sa P7 milyones.
Si Gullas nidugang nga kun hatagan siya og igong kusog hayan sa sunod tuig moapil gihapon sila ug dili na gyud kaayo dako ang budget nga igahin niini.
Apan iyang giseguro nga makasarang sab sa gastuhan sa mga moapil sa contingent. Ang Talisay City Contingent naggikan sa Talisay City Central School diin ang ilang tema karong tuiga mao ang pag-promote sa cacao nga maoy himuong tablea ug chocolate. (BANAT NEWS)
- Latest
