PCAC magtapok na og balik karon

CEBU, Philippines - Pangulohan ni Cebu City Vice Mayor Edgardo Labella ang subling panagtapok sa Police Coordinating and Advisory Council kon PCAC karong adlawa.

Bisan og wala’y direktiba si Mayor Tomas Osmeña, gikonsiderar ni Bise Mayor Labella nga wala’y pagbabag ang mayor sa pag-reconvene sa PCAC.

Gitataw ni Labella nga hisgutan karong adlawa ang mga plano ug ang paggama og mga palisiya alang sa pagpadayon sa kalinaw ug kahapsay sa siyudad.

Ang PCAC gilangkuban sa mga nagkadaiyang law enforcement agencies sa siyudad nga naglakip sa DILG, NAPOLCOM, NBI, BFP, ABC, CCPO, DSWD, PDEA, CCTO, BBRC, Cebu Chamber of Commerce, Cebu City Prosecutor’s Office ug uban pa.

Sa iyang bahin si Konsehal Dave Tumulak, kinsa maoy chairman sa Public Order and Safety ug Police Matters miingon nga mutambong siya sa maong panagtigum apan maminaw lang siya kay mag-agad lang siya kang Mayor Osmeña.

Matud niya aduna say plano ang mayor bahin sa public order and safety sa siyudad isip chief executive ug kinahanglan mosubay ang PCAC sa plano sa mayor.

Dugang sa konsehal nga una kining panagtagbo sa PCAC sukad sa bag-ong administrasyon ug wala pa kini tukmang agenda hinungdan nga karong adlawa pa mahibaw-an ang ubang sakop nga maglangkub sa grupo. (BANAT NEWS)