Tunnel upat ka oras gisirado

CEBU, Philippines – Sirado kaganihang alas 3:00 hangtud alas 7:00 sa buntag ang tunnel sa South Road Properties (SRP) nunot sa ipahigayong paglimpiyo sa lugar.

Si Joy Tumulak, chief operation officer sa City Traffic Operation Management (CITOM) mibutyag nga ang maong kalihukan ubos sa pagpakigtambayayong sa ilang buhatan, Department of Public Services (DPS), Department of Public Works and Highways (DPWH) ug Bureau of Fire Protection (BFP).

Matud ni Tumulak nga tungod sa uwan dunay mga namilit nga lapok sa karsada sa tunnel ug ang reflector sa bongbong niini dili na maklaro tungod sa abog.

Gipasabot ni Tumulak nga sa maong sitwasyon delikado sa disgrasya ang mga motorista niini ilabi na kadtong magsakay og mga motorsiklo.

Apan giklaro ni Tumulak nga ang tunnel dili masudlan og tubig o mabahaan ug ang lapok nga nahibilin sa karsada gikan sa mga ligid sa sakyanan nga mangagi.

Ang mga sakyanan nga gikan sa habagatan paingon sa amihanan ug ang gikan sa amihanan paingon sa habagatan giawhag sa pag-agi lang una sa ibabaw sa tunnel samtang nagpahigayon pa ang pagpanglimpiyo.

Dugang ni Tumulak nga banlasan og tubig sa bombero ang tunnel ug dayon pasilhigan sa sweeper truck aron mawagtang ang mga lapok ug abog. - /GMR) (BANAT NEWS)