Tigpautang og kaldero gipatay

CEBU, Philippines - Manindahay og kaldero ug planggana ang napalgan nga naghapa daplin sa dalan nga naligo sa kaugalingong dugo ug nabulit sa samad-pinusilan ang kalawasan diha sa Sitio Bangkal, Barangay Jolo Maynon, lungsod sa Dalaguete.

Ang biktima giila nga si Mark Jey Romarate, 25, dunay live-in partner, residente sa Barangay Obong, Dalaguete.

Nagkanayon ang desk officer sa Dalaguete Police Station SPO1 Veronivo Centino nga nakit-an ang biktima sa mga lumalabay sa Sitio Bangkal nga naghapa nga nagkadugo ug napuno sa samad ang kalawasan hinungdan nga dali kining gi-report  sa barangay hall.

Gidugang ni Centino nga ang mga opisyales na sa barangay ang nipahibawo kanila labot sa maong hitabo ug dali kining girespondehan sa kapulisan nga gipangulohan ni PO3 Rodrigo Teo.

Matud sa kapulisan nga wala silay nakuha nga mga ebidensiya sa crime scene, walay saksi nga nakakita ug walay kabhang sa bala nga nakita sa maong gigamit sa pagpusil sa biktima.

Gisalikway sa kapulisan ang anggulo nga gitulis ang biktima tungod kay wala mangawagtang ang mga butang niini hinoon nagtuo ang mga tinugyanan sa balaod nga posibleng gipareglahan o ba kaha nasaypan lang kini. Ang mga kabanay sa biktma maoy miila kaniya diha na sa punerarya.  (BANAT NEWS)