Oportunidad sa Qatar midaghan

CEBU, Philippines - Midaghan karon ang naghulat nga trabaho para sa mga pinoy didto sa Doha, Qatar tungod sa umaabot nga Fédération Internationale de Football Association (FIFA) World Football Cup nga ipahigayon sa maong nasud sa tuig 2022.

Si Ambassador Cresecente Retuya Relacion, Chief of Mission sa Department of Foreign Affairs ug kasamtangang Ambassador Extraordinary Plenipotentiary sa Philippine Embassy sa Doha, Qatar, nakigkita kang Governor Hilario Davide III kagahapon.

Si Relacion mipahibalo kang Davide nga taas karon ang demand alang sa mga overseas workers ilabi na sa sector sa constructions tungod kay daghan kaayo ang mga imprastrakturang giplanohang tukoron sa Qatar nunot sa umaabot nga FIFA World Cup.

Matud ni Relacion, ang Qatar aduna ray 300, 000 nga populasyon, dili kini paigo aron matukod ang siyam ka bag-ong stadium, metro train, road networks ug pagpalapad sa mga kalsada, seaport developments, mga tambalanan, 80,000 ka hotel rooms ug ang giplanohan nga pagkonektar sa Bahrain sa Qatar nga gibanabanang gigahinan og 150 bilyones US dolyares.

Sa pagkakaron, adunay 200,000 ka mga trabahanteng Filipino sa Qatar ug kasagaran kanila mga service workers sa mga restaurant ug hotel ug nurses.

Giawhag usab ni Relacion si Davide nga awhagon ang mga Sugboanon nga suwayan ang agricultural companies didto sa Qatar nga misaad maoy mogasto sa mga panginahanglanon sa mga estudyante nga mikuha og kursong agrikultura ug ingon man mga researchers sa agrikultura sa maong nasud. (BANAT NEWS)