Libre nga mammography itanyag sa Dakbayan sa Sugbo

CEBU, Philippines — Gipahibalo ni Kenneth Siasar, chief ni Mayor Nestor Archival nga adunay libreng mammography program sa Dakbayan sa Sugbo isip kabahin sa mga kalihokan alang sa Pink October ning tuiga.

Magsugod ang registration karong adlawa, Oktubre 1 hangtod Oktubre 15, 2026 alang sa mga kababayen-an nga kwalipikado sa programa ilabi na ang nagpangidaron og 40 hangtod 50 anyos. Samtang ang aktuwal nga serbisyo sa mammography gikatakdang magsugod sa Oktubre 5, 2026.

Lakip sa mga requirements nga gikinahanglan mao ang medical certificate, barangay certificate of indigency, voter's certificate, ug CHAMP referral slip.

Gidasig ang mga interesadong kababayen-an nga moadto sa buhatan sa CHAMP nga nahimutang sa second floor sa atbang sa La Nueva aron makapangutana ug makadawat og hustong giya bahin sa registration, mga dokumentong kinahanglan andamon, ug proseso sa pag-avail sa libre nga serbisyo.

Ang maong programa gitumong aron mas mapalapdan ang access sa kababayen-an ngadto sa breast health screening ug early detection services atol sa pag-obserbar sa Pink October. (BANAT NEWS)