Lalaki naaktohang nipasuyop og gasolina sa sakyanan nga nagparada

CEBU, Philippines — Nasikop ang usa ka 18-anyos nga lalaki human masakpi nga nipayusop og gasolina sa mga sakyanan nga nagparada diha sa basketbolan Plaza Housing, Barangay Busay, Siyudad sa Sugbo kagahapon sa kadlawon.

Matud ni Busay Barangay Captain Yody Sanchez nga naabtan sa mga tanod sa barangay ang maong mga lalaki nga taga Golden Valley, Barangay Lahug, Siyudad sa Sugbo.

Nadakpan nila ni Konsehal Kevin Sanchez ug sa mga tanod si Jimmy Magno, Edgar Gabud, Dennis Abrigana ug gi-turnover nila kini sa Mabolo Police Station sa Cebu City Police Office.

Makita sa post ni Konsehal Sanchez nga ang suspetsado naabtan nga nag-ungot ang hose sa tangke sa multicab ug gipasuyopan kini og gasolina paingon sa galloon nga maoy gisudlan sa suspetsado.  Base sa report sa Mabolo Police Station pinangulohan ni Police Major Romeo Caacoy nga ang suspetsado notado diha sa dapit nga manuyopay og gasolina sa mga sakyanan.

Ug gani daghan na og reklamo sa mga tag-iya og sakyanan tungod kay imbes full tank ang ilang sakyanan mahibulong nalang sila nga empty na kini bisan og wala gamita.

Gikatakda nga pasakaan sa Mabolo Police Station og kasong pagpangawat ang suspetsado.  BDB BANAT NEWS