Negosyante’g buy and sell gipatay

CEBU, Philippines —  Gipusil-patay ang usa ka negosyante og motorcycle buy and sell sa sulod sa ilang panimalay sa Purok 2, Barangay San Miguel, Lungsod sa Cordova pasado alas- 9 sa gabii niadtong adlaw'ng Biyernes.

Giila ang biktima nga si Glecerio Andales Untal Jr., 42, giingong mamalitay ug motorsiklo nga iyaha sab ibaligya.

Sa report sa Cordova Municipal Police Station pag-abot nila sa lugar nakit-an nila nga nagbuy-od na ang biktima sa sawog sa ilang balay ug dunay samad pinusilan ug nagkadugo ang ulo.

Nangayo og tabang sa SOCO ang kapulisan sa Cordova aron pagproseso sa crime scene.

Sa imbestigasyon sa kapulisan,  ang pag-umangkon sa biktima mitug-an nga samtang toa sila sa ilang balay uban iyang igsuon ug amahan nakadungog sila og duha ka buto sa armas gikan sa balay sa uyoan.

Dihang ilang gitan-aw ang gawas sa balay sa biktima wala sila'y nakita hinungdan wala ra usab sila manumbaling.

Apan pagka alas 11:58 sa gabii  naukay silang tanan sa pag-abot sa anak sa biktima gikan nagpraktis sa Dinagat festival nakit-an nalang niya iyang amahan nga nagbuy-od sa sawong ug nagkadugo ang ulo ug dunay samad pinusilan sa dughan.

Gidala sa Cordova Rural Health Unit ang biktima apan nakabsan gyud kini sa kinabuhi.

Na recover sa SOCO nag usa ka bala sa .45 pistola nga wala makabuto, ug usa ka deformed bullet slug sa crime scene.

Padayon sab ang follow up operation sa kapulisan aron madakpan ang naghimo sa krimen ug padayon pa nga gisuta ang motibo sa krimen. (BANAT NEWS)