Gullas nipasusi sa kalig-on sa city hall

CEBU, Philippines — Nimando si Talisay City Mayor Gerald Anthony “Samsam” Gullas Jr. ngadto sa engineering department sa pagsusi pagbalik sa kalig-on sa City Hall.

Kini human nasinati ang kusog nga linog ngadto sa Abra niadtong niaging mga adlaw.

Gibutyag ni Gullas nga ilaha na kining napasusi kaniadto human usab ang kabisay-an nakasinati og kusog nga linog niadtong tuig 2013.

Apan si Gullas naniguro diin samtang mag-ayo sila sa mga nangaguba sa ubang parti edipisyo sa city hall tungod sa bagyong Odette ipasusi usab niya ang tibuok edipisyo pagsuta sa kalig-on niini.

Nunot niini, gikatakda karong adlawa nga moanha sa mga bukirang barangay ang mga sakop sa City Disaster Risk Reduction and Management Office ug ubang tinugyanan sa city hall aron sa pagbutang og markings ug signages sa fault line sa Dakbayan sa Talisay.

Niadtong niaging semana, ang opisyales sa barangay gipaubos sa seminar kalabot sa fault line ug sa ilang pagabuhaton panahon nga moigo ang katalagman.

Ang maong kalihokan subay usab kini sa pagsaulog sa Disaster Resilience Month. BDB (BANATNEWS)