Illegal nga drugas nikunhod, 10 ka sugarol nasikop sa Talisay
Cebu, Philippines — Gitug-an sa pangu sa kapulisan sa Dakbayan sa Talisay nga nimenos ang demand sa ilegal nga drugas karong tuiga.
Si Police Major Gerard Ace Pelare niingon nga kun ikumpara ang Talisay karon ug sa nanglabay nga katuigan dako na gyud kini og kausaban kung hisgutan ang ilegal nga drugas.
Gidugang ni Pelare nga kaniadto kung motungtong na sa buwan sa Disyembre pinangita na ang ilegal nga drugas. Apan karong tuiga ningminus na.
Daku ug natampo sa pagkunhod sa drugas ang adlaw adlaw nga presensya sa kapolisan ug ang pagkasikop sa mga dagkung pangalan sa illegal nga negosyo.
Samtang sa laing bahin didto magsaulog sa pasko sa prisohan ang 10 ka sugarol human sila masikop sa managlahing barangay sa Talisay.
Lakip sa gironda sa kapulisan ang sitio Maharlika, Barangay Pooc dihang nakadawat og taho nga adunay nagpahigayon og tigbakay.
Ang mga nadakpan mao sila si Francisco Alipio, 19 anyos; Rodulfo Molero Dominguito, 48 anyos; Benjie Briones Largo, 36 anyos; Junril Montellano Garing, 24 anyos ug si Dennis Montillano Evangelista, 29 anyos.
Samtang sa sitio Campinsa, Barangay Manipis , nadakpan usab sila si Absalon Nadela Jabasa, 62 anyos; Isidro Letimas Silva, 60 anyos; Paul Gil Cabreros, 33 anyos; Lenard Pardillo Habasa, 28 anyos ug si Mario Fernandez Badayos, 61 anyos. ( BANAT NEWS)
- Latest
