Garcia: Kinahanglang pirmeng naay polis sa dalan

CEBU, Philippines — Gipakigkitaan ni Vice Mayor Raymond Alvin Garcia ang kapulisan sa Cebu City Police Office kagahapon sa buntag, usa ka adlaw sa iyahang pag-asumir isip acting mayor sa Siyudad sa Sugbo human  nasuspenso og unom ka buwan si Mayor Michael Rama kagahapon sa buntag.

Gisugat ni Cebu City Police Office Director Colonel Ireneo Dalogdog si Garcia.

 Sa iyang mensahe  kini miingon nga usa ra gyud ang iyahang marching order sa kapulisan sa siyudad ug kini mao ang palambuon pa gyud ang presensiya sa kapulisan sa kadalanan.

Gihulagway ni Garcia nga mas mabati sa katawhan sa dakbayan nga luwas sila kun makita nila ang presensiya sa kapulisan.

"I only have one marching order under my watch we made to increase police visibility, we need beat patrols kn every critical areas of the City especially in crime prone areas,  let your presence be felt in high density areas, in establishments where Cebuanos do their business, in schools, in our public places especially in our busy streets," matud ni Garcia.

Gusto ni Garcia nga tutukan sa kapulisan ang areas of concern sama sa drug trafficking kay mao ni sagad hinungdan sa gagmay ug dagko nga krimen dinhi sa siyudad sa Sugbo.

Patutukan sab niya ang crime prevention bisan naobserbahan sa opisyal nga dili na grabe ang krimen karon itandi sa nanglabay nga katuigan.

"In fairness, I personally tell you all of you for keeping the crimes down and urge you to never ever let your guard down," ni Garcia pa.

Midugang si Garcia nga kinahanglan kini ilabi na ang Cebu City maoy mo host sa Palarong Pambansa 2024.

Subay niini, si Dalogdog miingon nga makita karon pirme sa kadalanan ang kapulisan sanglit gihimo na nila kini subay na sab sa mando sa ilang labaw.

Dako og tabang ang pagpalig-on sa presensiya sa kapulisan kay nikunhod ang mga krimen sa unang quarter sa tuig 2024 itandi sa miaging tuig.

Base sa datos sa CCPO nakatala lang sila og 2,769 ka mga kaso gikan sa Enero 1 hantod sa Mayo 13, 2024 itandi sa 3,333 ka mga kaso nga natala sa samang period sa miaging tuig.

"Nakita nato didto epektibo gyud, from time to time mag adjust ta kung asa tong naay mga crime prone areas mag adjust dayon ta atong deployment sama sa nahitabo didto sa Mambaling Police Station gaya ng Mambaling may mga shooting incident didto diha-diha dayon atong giaksyunan sa atong Tactical Motorcycle Riding Unit ato sila gipadala didto para mag visibility didto sa mga remote areas para masugpo ning shooting incident pero so far wala na, ato na siyang na preempt," asoy ni Dalogdog. – IBM BANAT NEWS