Mga nasunogan gihatagan og hinabang
CEBU, Philippines — Mga biktima sa sunog sa Sitio Mahayahay, Barangay Poblacion, Dakbayan sa Talisay ang gihatagan og mga hinabang ni Mayor Gerald Anthony “Samsam” Gullas Jr.
Ang maong insidente sa sunog nahitabo niadtong Lunes sa hapon diin giisa kini sa kabomberohan sa 2nd alarm.
Niabot sa 13 ka balay ang naugdaw ug duha ang partially damaged o nakan-an sa kayo.
Si Gullas nagkanayon nga napupos na ang tulo ka adlaw nga motunol og pagkaon ang siyudad ngadto sa mga nabiktima hinungdan nga sila nitunol na usab sa pinansiyal nga hinabang aron ang mga nasunogan makapatukod og balik sa ilang pinuy-anan.
Si Felipa Solana, pangulo sa City Social Welfare and Development (CSWD) nagkanayon nga P10 mil ang ilang gihatag sa totally damaged ug P2 mil ang partially damaged.
Ang kabomberohan nitutok sa anggulo nga faulty electrical o ang pag-spark sa wiring nga maoy hinungdan sa sunog nga nikatap ngadto sa ubang kabalayan.
Si Kapitan Edward Alesna ug ang iyang konseho nihatag usab og pinansiyal nga hinabang uban kang Gullas.
Si Gullas nanghinaot nga hinay-hinay nga makabangon ang mga nasunogan. /BDB (BANATNEWS)
- Latest
