Mayoriya sa konseho moalalay ni Ahong

CEBU, Philippines — Gituohan nga ang mayoriya nga mga konsehal sa Dakbayan sa Lapu-Lapu nga sakop sa Team Deretso ang modapig sa bag-ong administrasyon ni Mayor Junard “Ahong” Chan sa Team Libre.

Una na nga nakita ang suporta sa resolusyon sa pagdeklarar ubos sa state of calamity sa Isla sa Olango ingon man ang kapakyas sa pag-override sa mayoriya sa ordinansa nga gi-veto sa mayor.

Si Konsehal Alexander Gestopa nga usa sa mga sakop sa mayoriya nga nahinabi sa Banat News niingon nga ang ilang pagsuporta sa resolusyon nga nagdeklarar nga state of calamity sa Isla sa Olango iyang gihimo tungod kay nakita man niya nga makaayo sa mga molupyo nga naepektohan sa pagkanselar sa mga biyahe sa mga barko tungod sa nasinati nga dagkung balud.

Gitataw niya nga nagpabilin nga iyang gibarugan ang kaayohan sa katawhan sama sa iyang pagsuporta sa pag-override sa gi-veto nga ordinansa ni Chan.

Giangkon ni Gestopa nga adunay mga tinguha nga iyang suportahan ang mayor sa gi-veto niining ordinansa apan hugot niyang gibarugan ang pag-override niini.

Kini may kalabutan sa plano nga pag-develop sa kabaybayonan sa dakbayan.

Gitataw ni Gestopa nga dili ang paglangay-langay sa proseso sa mga nagtinguha sa pagnegosyo sa dakbayan ang ilang katuyoan kun dili usa lang ka simple nga pag-regulate sa ingon nga paagi dili kaabusohan sa pag-develop ang kabaybayonan sa dakbayan.

Matud ni Gestopa nga usa siya sa siyam nga mga konsehal sa mayoriya nga nagtinguha unta sa pag-override sa gi-veto sa mayor nga ordinansa apan wala sila magmalampuson tungod kay tulo man sa napulo nilang kauban sa mayoriya nga konsehal ang nisuporta sa pag-veto. Gibutyag ni Chan nga anaa na sa walo ka konsehal sa mayoriya ang iyang gihatagan og 10 ka staff sa ilang tagsa-tagsa ka buhatan.

Kini naglakip nilang Konsehal Queenine Malingin-Amman, Marcial Ycong, Junrey Gestopa, Rico Amores, Rex Mangubat, Efren Herrera, Epoy Paquibot ug Laika Tampus.

Dugang pa niini nga gawas sa walo ka konsehal, giingong nagpabatyag na sab ang laing upat ka konsehal nga kaalyado ni kanhi mayor ug kongresista Arturo Radaza. (/GMR)(BANATNEWS)