Model nga bata sa 4ps gipasidunggan

CEBU, Philippines – Gipasidunggan sa Department of Social Welfare and Development 7 ang top 3 sa 2019 Exemplary Pantawid Pamilya Children gikan sa nagkalain-laing lugar sa Probinsiya sa Sugbo.

Ang mga napili mao sila si Jhon Rod Amodia taga Cordova isip first place, Kriszia Gullem sa Bogo City sa second place ug Ken Renzo Garciano Poro, Isla sa Camotes.

Nakadawat og cash prize nga P5,000 ang first place; P4,000 ang second place ug P3,000 ang third place ug hatagan sab sila og P1,000 nga transportation allowance ug certificate of recognition.

Nagkanayon si Pantawid Information Officer Sherwin Macopia nga tinuig kini nga pasidungog sa kabataan nga  naapil sa Pantawid Pamilya Pilipino Program nga nagpangedaron og 10-anyos ngadto na sa 14-anyos.

Matud ni Macopia nga isip mga bata daku ang ilang papel sa implementasyon sa programa tungod kay dili kini dole-out ug dunay mga kondisyon nga kinahanglan tumanon sama sa 85 percent school attendance ug pag-adto sa health centers.

“Kinahanglan magpakita ang bata nga maayo siya’ng ehemplo sa iyang komunidad, sa iyang balay, didto sa eskwelahan kay we are looking for role model or mga ambassador sa programa,” matud ni Macopia.

Si Amodia nalipay sa maong pasidungog kay matud niya ang programa sa DSWD daku gyud og tabang sa iyang pamilya nga kanidato naglisud og palit og school supplies. (/GMR)(BANAT NEWS)