Basura Mo, Sardinas Ko gihunong una

CEBU, Philippines – Kasamtangang gipahunong una sa Department of Public Services ang pagpatuman sa Basura Mo, Sardinas Ko progam.

Gipahibawo sa acting head sa DPS nga si John Paul Gelasque nga ang bag-ong procurement sa sardinas niabot duha ka semana na ang nakalabay apan wala una nila kini gipanghatag isip kortesiya sa umaabot nga bag-ong administrasyon sanglit ang maong programa gisugdan kini ni outgoing Mayor Tomas Osmeña.

Maghuwat una ang DPS kon ipadayon o dili sa administrasyon ni Mayor-elect Edgardo Labella ang naasoy nga programa.

Ang mga naabot nga sardinas nga anaa sa warehouse sa DPS nagkantidad og P3 milyones ug ang maong buhatan nangayo og budget sa maiging tuig aron maapil kini sa 2019 annual budget.

Matud ni Gelasque nga kon ipadayon ang programa sa umaabot administrasyon, daku ang posibilidad nga mausab ang direksyon niini.

Ang pamaagi sa Basura Mo, Sardinas Ko mao nga ang tunga sa sako sa basura bayloan og usa ka latang sardinas, duha ka lata sa sardinas sab ang bugti sa usa ka sakong basura. Samtang lima ngadto na sa unom ka putos sa plastic sa basura mabayloan na og usa ka latang sardinas.

Gihulagway ni Ggelasque nga daku kini og epekto, gani sa pilot areas nila nga mao ang Brgy. Cogon Pardo ug Lahug, daku kaayo og deperensiya kay ang mga tawo dili na molabay sa ilang basura sa kasapaan kay ila na kining tapukon ug pabayloan og sardinas.

Samtang ang kagamhanan sa Dakbayan sa Talisay, misulod og Public-Private Partnership diin gitugyan niini ngadto sa pribadong kompaniya ang pagkolekta sa basura ug ang pagdumala sa ilang landfill. Sa tinguha nga makadaginot ug mas epektibo ang paghipos sa mga basura.

Si Edwin Nierves, ang pangu sa Solid Waste Management sa siyudad mitataw nga niadtong buwan sa Marso, nagsugod ang Cebu Solid Waste Management Incorporated.

Giklaro niya nga ang pagkolekta lang una og basura ang gihimo sa maong kompaniya sanglit padayon pa nilang gisukod ang boundary sa yuta sa landfill nga maoy ugmaron sa pribadong kompaniya.

Ang maong landfill unang gikabalak-an nga mapuno sa umaabot nga katuigan mao nga sa kaugmaran nga himuon sa naasoy nga pribadong kompaniya, maghimo sila og Solid Waste Integrated Complex.

“Ang mga basura ma-recycle na gyud ug magamit na gyud sa taas nga katuigan ang lugar,” nagkanayon si Nierves.

Sa pagkakaron, ang maong pribadong kompaniya anaa una sa national highway nanguha og basura samtang ang mga barangay lang una ang nangolekta sa mga sudlonon nga dapit. (Gabriel C. Bonjoc/DILT)(BANAT NEWS)