Bag-ong nakapiyansa patay
CEBU, Philippines — Patay diha-diha ang usa ka construction worker nga bag-o lang nakapiyansa sa kaso sa ilegal nga drugas sa Sitio Rattan, Barangay Tangke, Dakbayan sa Talisay niadtong Sabado sa gabii.
Ang biktima nailhan nga si Carlos Villaver, 40-anyos, minyo nga nagpuyo sa maong lugar.
Si Police Senior Sergeant Glenn Besande sa Talisay City Police Station dali nga niresponde sa maong lugar human nadawat ang alarma nga pagpamusil.
Si Besande mao nay naghiling sa lawas ni Villaver tungod kay aduna pay gitubag nga alarma ang taga Scene of the Crime Operatives (SOCO) sa Lungsod sa Sibonga ug Liloan. Base sa imbestigasyon sa kapolisan nasuta nga nagmaneho sa iyang bisekleta si Villaver sa dihang gibirahan sa duha ka lalaki nga nagsakay og motorsiklo nga nagsul-ob og bonnet.
Nisibat lang sab ang mga mamumuno human nahagba ang biktima sa karsada.
Matud ni Police Major Ardeolito Cabagnot, deputy chief sa Talisay City Police Station, nga nadakpan na nila si Villaver gumikan sa paghupot og ilegal nga drugas niadtong buwan sa Abril.
Nakagawas kini niadtong Mayo 16 human siya nipiyansa.
Gitutokan sa kapolisan ang motibo sa pagkalambigit sa ginadiling drugas sa biktima. (BANAT NEWS)
- Latest
