Talisay City hall naukay

CEBU, Philippines — Trabaho sa Talisay City Hall ang napurnada kagahapon human usa ka gray nga back pack ang gibiyaan sa tag-iya ang nakamugna og kabalaka sa pagtuo nga aduna kini bomba. Namatikdan nga may nagkidlap-kidlap sulod sa maong bag gawas sa Persons with Disability Affairs Office nga nahimutang sa may upper ground floor sa wala nga bahin sa City Hall pasado alas 9 sa buntag. Matud ni Bienvenido Llera, usa ka job order nga empleyado, nga nagtuo sila nga adunay bomba o kaha power bank kay aduna may nagkidlap-kidlap hinungdan nga gipagawas ang tanang empleyado aron sa pagseguro sa kaluwasan sa mga tawo ug walay mahimong casualties.

Dugang pa ni Llera nga human sa pagpagawas sa mga tawo ug pagpalayo, nipahibawo sila sa kapolisan ug sa taga bomb squad dayun gikordon ang lugar. Gibutyag ni Llera nga gipahibawo na sab nila kung kinsay tag-iya sa maong bag apan walay ni-claim hinungdan nga tanang tawo gipagawas.

Tungod sa maong bag, nimando dayun si Mayor Eduardo Gullas, sa pagsuspenso sa trabaho sa City Hall aron masusi ang tibuok lugar pagseguro sa kaluwasan sa mga tawo.

Gimanduan sab sa mayor ang tanang security guards sa dili pagpasulod ni bisan kinsa ug niawhag sa mga tawo nga magpabiling kalmado ug mosunod sa tanang protocols nga gihatag sa kapolisan.

Samtang nagpaabot ang mayor sa personnel gikan sa Explosive Ordnance Disposal (EOD) Team gikan sa Police Regional Office 7, iyang giawhag ang katawhan sa pag-ampo kang Señor Santo Niño ug Sta. Teresa de Avila alang sa kaluwasan. Sa dihang gisubay na sa EOD Team ang bag, nasuta nga dili kini bomba ug mga personal lang kini nga mga gamit sa usa ka tawo hinungdan nga ipaubos kini sa imbestigasyon kung nganong naabot sa maong lugar ang maong bag ug kinsa sab ang nagdala niini sa maong buhatan. (GMR) (BANAT NEWS)