Nagsunog sa kaugalingon

CEBU, Philippines – Usa ka 53 anyos nga giingong na-depressed ang gituohang nagsunog sa kaugalingon nga nakaingon usab sa pagkasunog sa kabalayan sa ilang mga paryente diha sa Sitio Purok 8, Barangay Kamputhaw, Siyudad Sugbo kagahapon sa buntag.

Ang gituohang naghikog mao si Alexander Sanchez, alyas Buddy, 53 anyos, ug residente sa maong lugar. Diin naapil usab sa pagkapaig sulod sa iyang balay.

Matud sa iyang igsuon nga si Teofil Sanchez, dugay nang nagsige og yawyaw si Alexander niadto pang Pasko mahitungod sa kwarta.

Sumala pa niini naproblema ang igsuon tungod kay gamay ra ang nakobra niini sa gipanday niyang balay didto sa Dakbayan sa Talisay.

Giingong nagdahom ang iyang igsuon nga may P23 mil pa kining kubrahunon sa iyang gitrabahoan apan P4 mil ray gihatag sa iyang agalon.

“Pag sumada niya sa iyang amo, P4 mil nalang nahibilin, unya utangan pa gyud siya diri kwatro mil sad kapin. Di wa na siyay nahimo mao nang nag-init iyang ulo, liwas Pasko nagsige na siya’g kasuko, sige’g sapot, sige’g andar, niya sige dayun siya’g hulga mag suicide,” dugang pa ni Teofil nga nakahinabi sa Banat News.

Matud usab niya nga mogamit og ilegal nga drugas ang igsuon.

Aduna sab kini gibilin nga lima ka pahina nga gisuwat sa yellow pad nga giingong “suicide note”nga gitunol kini niya sa iyang iyaan una pa mahitabo ang maong paghikog.

Si Fire Officer 3 Nelson Daculan, imbestigador sa Bureau of Fire Protection -7 miingon nga hingpit napawong ang sunog alas 9:54 sa buntag.

“More or less P80 mil ang danyos sa maong sunog. Naay alegasyon nga suicide ang maong hinungdan sa sunog. Lima ka structures ang naigo sa sunog diin tulo and totally burned ug duha ang partially burned,” dugang pa ni FO3 Daculan.

Miasoy sab si Daculan nga nagsugod ang maong sunog mismo sa tugkaran sa biktima ug wala kini nakadako kay girespondehan kini dayun sa mga bombero.

Samtang sa laing insidente sa sunog, tulo ka sakop sa usa ka pamilya ang nangaangol sa sunog nga miigo sa ikaduhang andana sa ilang panimalay sa miaging gabii diha sa Barangay Cubacub, sa Dakbayan sa Mandaue.

Si Senior  Fire  Officer 1  Wendell  Villanueva sa Mandaue City Fire  Station miila sa mga nangaangol nga mao sila si Pablito  Baldado, tag-iya sa nasunog nga panimalay ug mga sakop sa ilang pamilya nga sila Jessie Baldado ug Joebert Baldado. Silang tulo nangapaso tungod sa pagsuway og pawong sa kalayo.

Si Villanueva miingon nga giimbestigar pa kun unsay hinungdan sa sunog ug usa sa ilang gitan-aw ang faulty electrical wirings ang hinungdan. (Romeo  T. Limpangog/IBM)(BANAT NEWS)