Illegal drugs tutokan pa

CEBU, Philippines — Pangusgan pa sa kapolisan sa probinsya sa Sugbu ang operasyon batok ilegal nga drugas karong tuiga. Kini  tungod kay daghan gihapong mga ilegal nga drugas ang pirmeng masakmit sa kapolisan bisan paman sa kadaghan na sa mga drug personalities silang nadakpan sa nakalabay nga tuig.

“We will not stop until we can bring you to the bar of justice,” bahad ni Police Senior Superintendent Manuel Abrugena ang direktor sa Cebu Provincial Police Office ngadto sa mga durugista ug mga kriminal.

Si Abrugena nga nakahinabi sa Banat News nagkanayon nga sa iyang pito ka buwan isip direktor sa kapolisan sa probinsya sa Sugbo daghan na sila og na-accomplish hilabi na programa kontra druga diin minilyon ka pesos nga kantidad sa ilegal nga drugas ang ilang nasakmit.

Sigon pa ni Abrugena, alang kaniya ang labing malampuson nga kampanya kontra sa ilegal nga drugas nga ilang nabuhat sa miaging tuig mao ang pagpakunhod sa  supply and demand sa ilegal nga drugas sa Barangay Tangke, Talisay City.

Ang maong barangay maoy gikonsiderar nga naglabi ang paghitak sa ilegal nga drugas ug gani nahimo nang negosyo sa ubang residente hinungdan nga gitutokan kini karon sa kapolisan.

Si Police Regional Office sa Central Visayas (PRO-7) Director Chief Superintendent Debold Sinas nagkanayon nga bisan pa man og dagko ug daghan ang ilang kalamposan sa kampanya kontra ilegal nga drugas ug mga krimen, dili sila mohunong.

Giangkon sa kapolisan nga bisan pa man sa gidaghanon sa mga ilegal nga drugas nga ilang nasakmit wala gihapoy paghubas ang supply niini ug mao kini ang ilang gustong tutokan karong tuiga.

Niadtong nakalabay nga semana, ang sinaligan sa nitahan nga druglord nga si Franz Sabalones nadakpan sa kapolisan didto sa Argao ug nakuhaan og P10  milyones nga shabu. Si Tocelio Ababon gidakop sa mga sakop sa Provincial Intelligence Branch.

Pipila ka adlaw usab sa wala pa madakpi si Ababon, nakasakmit usab ang kapolisan og balor P48 milyones nga shabu gikan sa duha ka mga bigtime drug dealers sa Cebu City.

Matud pang Sinas, bisan pa man og duna pa gihapon niini sa kadalanan apan nakita na sa mga tawo nga wala magmika ang kapolisan paghimo sa ilang trabaho ug gani nalipay siya nga hinay-hinay nang nibalik ang pagsalig sa katawhan diha kanila.

Si Abrugena malaumon nga padayon silang suportahan sa katawhan.

“We are looking forward to a stronger support to maintain peace, order and public safety. Let’s make every corner of our community safe from dangers of drugs,” sigon pa ni Abrugena.

Gipangandaman nila karon ang umaabot nga midterm elections.

“We do not have to be complacent, we have to look forward this coming 2019 since election period is fast approaching, strive hard and work more to compensate the salaries and incentives we are receiving from the government,” sigon pa ni Abrugena. (BANAT NEWS)