HPG-7 official gi-clear sa Archival ambush
CEBU, Philippines — Ang kanhi hepe sa Highway Patrol Group-7 nga giakusahan sa pagbanhig patay kang Atty. Noel Archival ug mga kaubanan upat ka tuig na ang nakalabay gi-clear sa Department of Justice sa kaso.
Si Police Senior Superintendent Romualdo Iglesia miduso og petisyon sa DOJ nga ipaubos sa review sa iyang kaso nga diin siya giapil sa gipakasohan kaniadto ni acting provincial prosecutor Jesus Rodrigo Taga-an og three counts of murder and frustrated murder.
Si Undersecretary Deo Marco naminaw sa petisyon ni Iglesia ug gipadaplin una ang resolusyon ni Taga-an.
"After careful and judicious review of the case records, the Office begs to disagree with the said Resolution of the Acting Provincial Prosecutor of Cebu, insofar as respondent-appellant Romualdo Iglesia is concerned. Moreover, we find merit in his appeal, thus, We rule to grant and give due course to his petition," matud pa sa resolusyon nga penetsahan og Nobiyembre 15, 2018.
Matud pa sa DOJ, ang mga ebidensya nga gipresentar batok sa niapelar nga si Iglesia wala makapamatuod nga kabahin gyud kini sa nagplano pagpatay kang Archival.
Kauban ni Iglesia sa maong kaso silang Senior Inspector Joselito Lerion, ug PO1 Alex Bacani.
Kauban ni Archival nga nangamatay mao ang iyang driver nga si Alejandro Jayme, bodyguard nga si Candido Miñoza. Nahitabo kini niadtong Pebrero 18, 2014, sa Barangay Corro, Dalaguete.
Ang alalay lang ni Archival nga si Paolo Cortes ang naluwas sa maong ambush.
Ang usa sa mga abogado sa mga akusado nga si Atty. Inocencio dela Cerna, Jr., mihulagway nga inisyal kini nga kadaogan sa depensa ug gipaabot usab nila ang resolusyon sa laing petisyon nilang Bacani ug Lerion.
"This issue might open old wounds but right from the start the defense believes, they are innocent," he said.
Ang Department of Justice mimando karon sa Provincial Prosecutor sa Sugbo nga i- withdraw ang tanang impormasyon sa kasong murder ug frustrated murder nga gipasaka batok ni Iglesia diha sa Regional Trial Court Branch 16 sa Cebu City. (Gikan sa The Freeman/IBM)
- Latest
