Tag-iya og lodge gibuk-an sa ulo sa Talisay

CEBU, Philippines — Patay ang tag-iya sa usa ka lodging house human kini gipusil sa wa mailhing lalaki diha mismo sa iyang establisamento nga nahimutang sa sitio Sangi, Barangay Tabunok, dakbayan sa Talisay niadtong Domingo sa kadlawon.

Ang biktima mao si Rene Gomez alyas Opaw, 36, taga Frotier Village, Barangay Bulacao sa maong siyudad.

Si PO2 Arthur Abedania sa Talisay City Police Station nibutyag nga natulog lang ang biktima diha sa lantay sa iyang lodge sa dihang gisulod kini og kalit sa wa ilhing gunman.

Wala’y daghang estorya gipusil ang biktima makaduha ka higayon diha tumong sa iyang agtang gamit ang .45 nga pistola.

Gitabang ang biktima apan nakabsan gyud kini sa iyang kinabuhi gumikan sa ka fatal sa iyang igo.

Si Abedania nagkanayon nga una nilang gitan-aw nga anggulo mao ang pagkakita og lalis sa biktima sa usa ka hubog diha sa iyang lodge, ikaduha mao ang wala pagdawat niini sa lalaking gustong mosulod pagka room boy ug ang ikatulo mao ang iyang negosyo. Gidudahan nga gun-for-hire ang mga nipatay sa biktima.

Samtang patay usab ang usa ka 42- anyos nga lalaki nga gipusil sa duha ka wa pa mailhing mamumuno nga namalit pa og sigarilyo sa tindahan niini diha sa sitio Canlope, barangay Poblacion, lungsod sa Alcoy niadtong Domingo sa hapon.

Ang biktima didto sa Alcoy giila nga si Christian Debulosan, residente sa maong dapit.

Sumala pa sa deputy chief sa Alcoy Police Station ug imbestigador usab sa maong kaso nga si Police Inspector Ramuel Banogon nag-inom ang biktima uban sa iyang mga paryente gawas sa tindahan niini dihang kalit nga niabot ang duha ka wa mailhing mga lalaki luwan og usa ka puwa nga motorsiklo.

Ang angkas nipalit og sigarilyo sa tindahan ni Debulosan ug maoy nipusil kaniya.

Gibutyag ni Banogon nga politika ang ilang gisubay nga motibo sa maong krimen human nasuta nga usa ka coordinator sa usa ka politiko si Debulosan.

“Coordinator siya sa usa sa mga politiko sa barangay. Giduol kuno ni siya sa pikas pero nibalibad kay die hard man siya nga coordinator ani nga politiko sa barangay Poblacion,” si Banogon miingon.

Sa barangay Molao, Compostela, nangaangol ang managparyenteng sila si Jaymar Quilantang 24, Aljon Monte, 24 ug usa ka 16 anyos human kalit gipamusil sa usa ka Jesus Diongson Jr. nga nadakpan usab sa kapolisan.

Sumala pa sa imbestigador nga si PO3 Daryl Rondina, ang biktima uban sa laing 13 ka mga paryente gikan nga namista sa Molao ug mamauli na sa Barangay Basak.

Naulahi sa panon ang tulo nga nagsakay og duha ka mga motorsiklo apan gisundan sila sa suspetsadong nagsakay sab og motorsiklo ug kalit sila niining gipamusil.

Matud ni Rondina, may kalagot si Diongson sa mga taga barangay Basak kay nakulatahan kini kaniadto didto. Usa ka 9mm nga pistola ug may magazine nga adunay mga bala ang nasakmit gikan kaniya. (BANAT NEWS)