5 diskohan may drug pushers

CEBU, Philippines - Gibutyag sa director sa Philippine Drug Enforcement Agency -7 Yogi Filemon Ruiz nga adunay mga namaligya og drugas sa lima ka mga balay kalingawan dinhi sa Cebu City ug Mandaue City.

Usa niini ang kontrobersiyal nga Liv Superclub sa Mandaue City apan dali kaayong giklaro ni Ruiz nga walay kalabutan niini ang tag-iya, mga nagdumala ug mga trabahante sa diskohan.

Matud niya aduna silay na-monitor nga mga gagmay nga manindahay og drugas nga anha magtagbo sa maong lugar sukad pa sa miaging tuig.

Matud pa ni Ruiz, aduna silay kooperasyon nga nadawat gikan sa nagdumala sa maong balay kalingawan sugod pa sa nilabay nga tuig nga niresulta sa pagkasikop sa pipila ka mga drug pushers nga nagbaligya og shabu ug ecstasy sa maong diskohan.

Dugang pa ni Ruiz, ang mga nagdumala sa maong balay patigayon naalarma sa mga street peddlers nga mopalusot og ilegal nga drugas hinungdan niduol sila sa PDEA.

Didto usab nila nasuta nga wala malambigit ang mga nagdumala niini ug seryoso gayud kini sa ilang trabaho.

Gitug-an ni Ruiz adunay tulo ka mga balay patigayon sa Dakbayan sa Sugbo ug duha sa Dakbayan sa Mandaue nga diin naglakip sa LIV Superclub diin adunay mga drug pushers nga nag-operate.

Matud niya nga padayon nilang gi-monitor si Kenneth Dong kinsa adunay gamay nga share apan wala direktang nagpadagan sa operasyon sa maong diskohan.

Niadtong Miyerkules sa gabii gisubay sa mga sakop sa law enforcement team sa dakbayan sa Mandaue ang Liv Superclub.

Matud pa ni Benray Conti, usa sa mga operations manager, nga dako kaayo ilang alkanse human nibuto ang isyu nga naglambigit sa ilang diskohan ngadto kang Dong.

Si Dong gipaubos karon sa imbestigasyon sa Senate Blue Ribbon Committee tungod sa pagpasulod sa P6 Bilyones nga shabu diha sa Bureau of Customs.

Si Conti mipasalig nga drug free ang ilang negosyo nga adunay usa ka gatos ka mga empleyado. Apan karon naapektahan gyud kini. (BANAT NEWS)