Tibuok pwersa sa Talisay andam na sa Ironman
CEBU, Philippines - Andam na ang tibuok pwersa sa kapolisan sa Siyudad sa Talisay sa paghatag og seguridad sa Ironman karong Domingo.
Kini maoy gipahibawo ni Senior Insp. Albert Quilotorio, deputy chief sa Talisay City Police Station.
Siya nagkanayon nga 65 ka polis ang ilang ipakatap sa rota sa Ironman sugod sa Barangay San Roque lahos na sa Talisay City Hall diin moagi ang mga atleta.
Sa kinatibuk-an, asoy pa ni Quilotorio nga moabot sa 900 ka personnel sa Talisay ang motabang sa pag-cordon sa karsada sa South Road Properties (SRP).
Nagbase si Quilotorio sa ilang final briefing nga gihimo niadtong Miyerkules sa hapon.
Langkuban kini sa kapolisan, bombero, barangay tanod, engineering, disaster management team, traffic enforcers, cadets sa Talisay City College ug uban pa.
Sugod sa alas 4 sa kadlawon makita na ang tibuok pwersa sa rota sa Ironman aron maseguro nga hawan na gyud kini.
Iyang pahimangno sa katawhan nga dili mokompiyansa sa mga dautang elemento nga mopahimulos sa higayon ilabi na kun malingaw na sa pagkuha og hulagway sa mga artistang moapil sa dakong kalihukan. (BANAT NEWS)
- Latest
