P1 nga usbaw sa plitehan giduso
CEBU, Philippines - Niduso sa ilang amended petition ang Cebu Integrated Transport Multi-Purpose Cooperative (CITRASCO) alang sa pagpasaka og P1 sa minimum fare sa PUJs sa Land Transportation Franchising and Regulatory Board-7.
Matud ni Ryan Benjamin Yu, general manager sa CITRASCO, nga imbis P1.50 nga umento sugod alas 7 hangtud alas 9 sa buntag ug alas 5 sa hapon hangtud alas 7 sa gabii, gihimo na nilang P1 sa tanang oras.
Ang petisyon gipasikad sa pagsaka sa presyo sa krudo diin P33 na ang matag litro nga susama sa presyo sa 2008 diin P8 ang minimum fare.
Gawas niini, matud sa CITRASCO nga nisaka na sab og P13 matag adlaw ang suhulan sa mga minimum wage earners sa Central Visayas. Dugang sa CITRASCO nga ang nagkagrabeng trapik sa Metro Cebu nakatampo usab kini nganong modako ang konsumo sa krudo sa mga jeepneys.
Kung aprobahan sa LTFRB ang petisyon, mahimo na unyang P7.50 ang minimum fare sa mga PUJs. (BANAT NEWS)
- Latest
