Mga ahente kasohan og child abuse

CEBU, Philippines - Pasakaan  sa kapolisan og kaso sa Republic Act 7610 kon Anti-Child Abuse ang unom ka mga ahente og libro nga gipasanginlang nisuway og dagit og estudyante sa Minglanilla Central School.

Tungod sa maong hitabo, gusto sa munisipyo nga pabantayan na pud og mga tanod ang mga tunghaan sa lungsod.

Si Konsehal Jerry Canares, chairman sa committee on peace and order sa maong lungsod nibutyag nga dili gyud angay mokompiyansa karong panahona.

Asoy pa niya kun mahimo ubanan sa kapulisan ang mga barangay tanod aron mabati sa mga bata ingon man ginikanan nga luwas sila sa mga tawong dautan.

Samtang si Konsehal Prose Fajutrao, chairman sa committee on Education nitataw nga iya nang gipahibawo ang mga magtutudlo nga tawagan dayon ang kapulisan kun adunay mga kasikas sa ilang mga tunghaan.

Si Superintendent Dexter Calacar, hepe sa Minglanilla Police Station mihangop niini kay matud niya dili kayahon sa kapolisan bantayan ang tanang mga eskuylahan.

Iya usab gibutyag nga wala silay nakitang  basehan aron kasohan ang unom og kidnapping.

Ang kasohan ugmang adlawa mao sila si James Paradela, Reymart Abobo, Frederico Dela Cruz, Estella Montes, Marian Sereño ug si Rhea Mae Sagmon nga pulos nagpaila nga educational consultants sa usa ka kompaniya nga nagbaligya og interactive materials. Matud pang Calacar, karong Lunes moduso og kaso ang pulis ug ang pamilya sa bata ug bahala na ang piskalya paghukom niini kun angay bang  iduso ngadto sa korte ang kaso.

“Akong tan-aw, murag kursonada sila kay naa na bayay incident ang Minglanilla sa kidnapping,” dugang ni Calacar.

Kahinumduman nga sa miaging February 8, 2011, nakitang patay si Ella Joy Pique sa lungsod sa Barili, human kini gikatahong gi-kidnap ni Ian Charles Griffiths ug uyab niini nga si Bella Ruby Santos sa Barangay Calajoan, Minglanilla, si Santos giabswelto sa maong kaso apan nagpadayon ang kaso sa uyab niini.  - /EIM) (BANAT NEWS)