Gipugos pagpainom nasuko ug nanunggab
CEBU, Philippines - Usa ka tawo nga namugos sa iyang amigo nga paimnon og ilimnong makahubog bisan og mopauli na unta kini, gidunggab gamit ang buwang sa manok ug anaa karon sa talandugon nga kahimtang.
Si Jason Cabuenas, 51-anyos, minyo nga taga Barangay Lagtang, Talisay gidunggab ni Tito Vilocura, 45, nga taga Barangay Lawaan. Didto mahitabo ang pagpanunggab sa Tabunok, Talisay kaniadtong Miyerkules sa hapon.
Nasikop hinuon dayon sa kapolisan si Vilocura, nga hilig kaayo manigbakay.
Si SPO1 Mikie Espina sa Talisay City Police Station nagkanayon nga sa wala pa mahitabo ang pagpanunggab, nag-inom pa ang biktima ug ang suspetsado ug nagkalalis.
Nakabantay nga ubay-ubay na usab ang iyang nainom, si Vilocura nananghid kang Cabuenas nga mopauli na ug dili na moinom, apan gipugos gihapon siya sa iyang amigo nga paimnon.
Giwakli ni Vilocura ang kamot sa iyang amigo nga nagtunol kaniya sa baso nga maoy nakapasuko ni Cabuenas. Matud pa nga diha-diha nga gisukmag ni Cabuenas si Vilocura.
Si Vilocura mikuot sa upat ka pulgadang buwang sa manok gikan sa iyang bulsa ug gigamit kini sa pagdunggab ni Cabuenas nga nakaangkon samad sa tiyan, dughan ug bukton. (BANAT NEWS)
- Latest
